Su Casteddu conchistat tres puntos a pustis de sa proa contra a su Milan. In sa trasferta lombarda sos òmines de Rastelli aiant dadu signales bonos, perdende sa partida petzi in sos ùrtimos minutos de giogu.
Contra a sas lìgures su Casteddu cumintzat bene. In sos primos binti minutos tenet una paja de ocasiones pro nche colare in vantàgiu, ma non b'at conca pro finalizare. A su de 29 minutos est su Genoa a nche colare in vantàgiu cun Simeone. S'atacante, lassadu a sa sola in àrea, cun sa conca nche giughet a dae in antis sos suos. Su passàgiu traessu fiat de Edenilson. Sos sardos parègiant a pustis de deghe minutos. Su tiru de Tachtsidis dae su lìmite de s'àrea est respintu dae Lamanna chi non resurtat a intervènnere in su tapin de Borriello. In bator minutos sos ruju-biaitos indiritzant su disafiu in favore issoro. Joao Pedro, in antis de s'intervallu, cun s'agiudu de sa traessa e de sa defensa aversària, nche marcat su vantàgiu.
Su segundu tempus sighit sa trata de su primu. A su de 59 minutos su portieri genoanu negat su gol a Joao Pedro cun una parada miraculosa. Su gol de su 3-1 però arribat a pustis de unu minutu torra cun Borriello. Su Genoa non bi resurtat a nch'essire dae s'àrea e sos sardos proant a iscravigare conca a Lamanna chi però si faghet agatare semper prontu. Finas a cando sa botza nche crompet a sos pees de s'atacante napoletanu chi nche l'istichit a intro. Àteros chimbe minutos e sos giogadores de Rastelli conchistant fintzas unu tiru de penalidade. Lu trasformat Farias e ismànniat su vantàgiu de sos suos: 4-1. Su ritmu mènguat agigu e su Casteddu abarrat in deghe òmines pro unu fallu de capuano a Pinilla. Su tempus pro una paja de sostitutziones e s'àrbitru nche frùschiat s'acabbu.
Formatziones
Casteddu: Rafael. Murru, Capuano, Ceppitelli, Isla, Dessena, Tachtsidis, Barella (83' Munari), Joao Pedro (81' Salamon), Farias (75' Sau), Borriello.
Allenadore: Massimo Rastelli
Genoa: Lamanna, Munoz, Burdisso, Izzo, Laxalt (75' Lazovic), Cofie (58' Ninkovic), Cataldi, Edenilson, Ocampos (66' Pinilla), Rigoni, Simeone.
Allenadore: Ivan Juric
Gol: 29' Simeone, 40' Borriello, 44' Joao Pedro, 59' Borriello, 64' Farias (p)
Espulsos: 79' Capuano
