Su Bologna arribat a Casteddu cun sa punna de sighire cun sa sèrie positiva de sas ùrtimas giorronadas. Ambas sas iscuadras, pro como, si sunt partzende sa de 10 positziones in classìfica, a 26 puntos.
Sos primos minutos de sa partida sunt totus de marca ruju-biaita. Borriello e Sau cumparint prus de una bia cara a Mirante chi però est semper bravu a parare fronte. A su de 16 minutos est su palu a negare su gol a s'atacante tonaresu chi aiat liberadu unu destru bene sestadu. A su de 25 minutos est Krafht a chircare su vantàgiu, ma Rafael est atentu e dèviat a foras. Su Casteddu est prus ispibillu de sos bolognesos. Di Gennaro est unu de sos prus ativos in mesu de su campu.
In su segundu tempus su ritmu non mènguat e sas ocasiones non mancant. Sau e Tachtsidis a su de 49 minutos e a su de 50, iscardint manos e pees a su portieri emilianu. Su Bologna nche colat in vantàgiu a sorpresa a su de 64 minutos. Unu passàgiu traessu de Krejci, a filu de terra, permitit a Destro de nche giùghere sos suos a su 0-1. S'atacante, lassadu a sa sola in àrea, nche devet petzi arrumbare sa botza a intro. A pustis de su gol sos òmines de Donadoni parent prus cuncretos e dinàmicos. Su Casteddu si lìmitat a mòvere in contratacu e a isfrutare sas faddinas aversàrias. A su de 82 minutos su Bologna andat a curtzu a su parègiu, ma sa defensa casteddaja, in una manera o in s'àtera, resesset a respìnghere sos tiros de Verdi e de Pulgar. A su de 88 minutos su Bologna abarrat in deghe òmines. S'àrbitru nche bogat a Viviani pro un'intrada cun su pee a marteddu. A su de 90 minutos Bruno Alves, cun sa conca, andat a curtzu a su parègiu, ma sa botza nch'essit arta. In su recùperu espulsu fintzas Krafth. In sa punitzione dae su lìmite de s'àrea, in su primu minutu extra, su Casteddu atzapat su parègiu cun Borriello chi indiritzat sa botza a su cugione in artu a dereta. Sa partida acabbat a pustis de àteros duos minutos.
Formatziones
Casteddu: Rafael, Pisacane, Ceppitelli (78' Miangue), Bruno Alves, Capuano, Dessena (86' Salamon), Tachtsidis, Isla, Di Gennaro, Sau, Borriello.
Allenadore: Massimo Rastelli
Bologna: Mirante, Krafth, Oikonomou, Maietta, Masina, Donsah, Pulgar, Nagy (72' Viviani), Di Francesco (62' Verdi), Destro (89' Torosidis), Krejci.
Allenadore: Roberto Donadoni
Gol: 64' Destro, 91' Borriello
Espulsos: 88' Viviani, 91' Krafth
