Su Casteddu, a pustis de sa derrota in Copa Itàlia contra a sa Sampdoria, torrat a mòvere in campionadu. Sa trasferta de oe pertocat su Pescara chi mèrcuris, in Copa, at retzidu tres gol dae s'Atalanta e at saludadu sa cumpetitzione. Sos abrutzesos, ocannu, no ant bìnchidu mai in s'istàdiu de domo.
Sas iscuadras, in antis de si disafiare, ant ammentadu sa disaura aèrea acontèssida in Colòmbia custa chida. Sos giogadores in campu non si rispàrmiant e istùdiant sas mossas pro assachiare. Sos sardos parent atentos e si faghent bìdere paritzas bortas in sos tretos de Bizzarri. A su de 24 minutos nche colant in vantàgiu. Su passàgiu longu de Di Gennaro est pretzisu a sos pees de Borriello chi avantzat e cun su mànchinu inferchit su portieri aversàriu. Est su de 6 gol in campionadu pro s'atacante casteddaju. A su de 33, però, sos sardos abarrant in deghe pro s'espulsione de Di Gennaro, cundennadu dae sa summa de duas targhitas grogas.
In su segundu tempus su Pescara chircat de tènnere vantàgios dae sa superioridade numèrica, ma sos tentativos no ant resurtu. A su de 75 Pepe andat a curtzu a su parègiu, ma su tiru suo nch'essit a foras de pagos tzentìmetros. Oramai bi cheret pagu a s'acabbu e su Pescara las proat totu cantas. A su de 92 minutos, cando pariat cundennada a sa derrota, s'iscuadra biancu-asula buscat sa botza de su parègiu. Su passàgiu longu de Biraghi nche crompet a sos tretos de Caprari chi fiat a sa sola in mesu a s'àrea minore. Su giogadore pescaresu s'illònghiat e nche l'ispinghet a intro. Non b'at prus tempus pro nudda, ambas sas iscuadras si pigant unu puntu peròmine.
Formatziones
Pescara: Bizzarri, Zampano, Gyömbér (91' Zuparic), Fornasier, Biraghi, Brugman, Ahmed Benali, Memushaj (59' Pettinari), Verre (69' Manaj), Caprari, Pepe.
Allenadore: Massimo Oddo
Casteddu: Storari, Isla, Ceppitelli, Bruno Alves, Pisacane, Barella, Di Gennaro, Dessena, Farias (46' Salamon), Borriello (82' Munari), Sau (68' Melchiorri).
Allenadore: Massimo Rastelli
Gol: 24' Borriello, 92' Caprari
Espulsos: 33' Di Gennaro
