Su Casteddu cheret sos tres puntos, mescamente a pustis de sa derrota in domo contra a su Napoli. Sa partida contra a sos toscanos est de importu, ca rapresentat unu disafiu pro otènnere puntos ùtiles a si sarvare. Intre sas duas iscuadras b'at ùndighi puntos de diferèntzia. Ambas iscuadras, in sas ùrtimas chimbe partidas, ant conchistadu petzi bator puntos.
Sa partida cumintzat cun faddinas meda, siat una banda e siat a s'àtera. A su de oto minutos s'Empoli nche colat in vantàgiu. Sa defensa sarda si nch'aberit comente nudda e Marilungo movet a dae in antis. Dae su ladus de dereta arrumbat sa botza a Mchedlidze chi est abarradu a sa sola in mesu a s'àrea. Su giogadore georgianu sena problemas nche l'ispinghet a intro marchende·nche s'1-0. Su Casteddu àrtziat deretu su baritzentru e chircat de torrare che pare cun sos biaitos, ma sas ocasiones non sunt cuncretas. A su de 31 minutos Marilungo si nche papat unu gol prus mannu de a issu etotu. Dae su ladus de manca nche bàrigat sa defensa, ma cando nche crompet cara a Storari tirat a foras. Sos ruju-biaitos imbetzes non resurtant a èssere perigulosos de su totu pro pòdere pònnere pensamentu a Skorupski.
In su segundu tempus b'at àpidu momentos de aprensione pro Barella chi est abarradu in terra a pustis de un'iscontru de giogu. A su tzentrocampista, chi pro seguru at iscutu sa conca, nche l'ant giutu a foras sos sucurridores. L'at sostituidu Di Gennaro. A su de 54 minutos s'àrbitru Rizzoli cuntzedet unu tiru de penalidade a sos casteddajos pro unu fallu in àrea a dannu de Melchiorri. A pustis de una consultatzione cun s'assistente de sa porta, però, mudat detzisione e assignat unu tiru lìberu contra a su Casteddu. Detzisione chi lassat dudas meda. In custa segunda fratzione de giogu s'Empoli at tzèdidu agigu de campu a sos sardos. Sos òmines de Rastelli sunt prus presentes e isvilupant mègius su giogu. A su de 72 minutos Mchedlidze, a sorpresa, raddòpiat su resurtadu. S'atacante lassat firma sa defensa casteddaja e a bolu nche còllocat sa botza in su cugione bassu de su segundu palu. Finas a como su resurtadu est prus chi non giustu. Sos sardos no ant cumbinadu belle nudda. Su tiru de penalidade beru su Casteddu lu conchistat a su de 81 minutos pro unu fallu a dannu de Farias, ma sa trasformatzione de Joao Pedro no acontesset ca Skorupski intzertat sa diretzione de su tiru. Sos ruju-biaitos tenent sa possibilidade de incurtziare s'isvantàgiu a su de 86 minutos, ma Giannetti, a sa sola in intro de s'àrea, si faddit unu corfu de conca bastante simpre. Acabbat 2-0 cun s'ennèsimu infortùniu de Di Gennaro chi, in sos ùrtimos tres minutos, lassat sos suos in deghe.
Formatziones
Empoli: Skorupski, Zambelli (24' Cosic), Bellusci, Costa, Pasqual (23' Dimarco), Croce, Diousse, Krunic, Saponara, Mchedlidze (82' Gilardino), Marilungo.
Allenadore: Giovanni Martusciello
Casteddu: Storari, Isla, Ceppitelli, Bruno Alves, Pisacane, Barella (51' Di Gennaro), Padoin, Dessena (69' Joao Pedro), Farias, Melchiorri, Sau (60' Giannetti).
Allenadore: Massimo Rastelli
Gol: 8' Mchedlidze 72' Mchedlidze
