Su Casteddu, cun sa vitòria de oe, nch'istèsiat, nessi pro su momentu, sos pantasmas de sa crisi. Sos sardos nde retzint tres dae sos nieddu-birdes, ma resessent a nde fàghere bator. Mèritu fintzas de s'òmine in prus a pustis de s'espulsione de Pellegrini.
Sos òmines de Rastelli cumintzant bene e andant in vantàgiu a su de 14 minutos cun Sau. Su giogadore tonaresu aprofitat de una botza respinta dae Consigli e nch'ispinghet a intro su gol de su vantàgiu. Sos ruju-biaitos parent prus cumbintos cunforma a sas ùrtimas aparitziones, ma non bastat. A su de 29 minutos su Sassuolo parègiat cun Adjapong. S'atacante istampat sa defensa dae su ladus de dereta, inferchit a Rafael e parègiat sos contos. Nche colant petzi tres minutos e arribat fintzas su raddòpiu de sos emilianos. Sa defensa casteddaja, tropu lasca, non serrat subra de Pellegrini chi, sena pressiones, tirat a filu de terra dae su lìmite de s'àrea e signat su vantàgiu. A su de 34 minutos su Sassuolo abarrat in deghe òmines. Espulsu Pellegrini pro unu fallu a Di Gennaro.
In su segundu tempus, mancari cun un'òmine de mancu, sos de Di Francesco nche marcant fintzas sa de tres. Tiru de penalidade trasformadu dae Acerbi pro unu fallu in àrea de Pisacane. Sa partida si ànimat e su Casteddu incùrtziat s'isvantàgiu a su de 63 minutos. S'autore est Borriello chi fiat intradu pagora. S'atacante napoletanu, dae su cugione destru de s'àrea nche còllocat sa botza in su segundu palu. Pro su parègiu tocat de isetare deghe minutos. Sos sardos si nche ghetant a dae in antis pro chircare de recuperare sa partida e sunt premiados a su de 73 minutos. Farias proat a tirare conca a sa porta de Consigli e, sena lu chèrrere nche marcat su de tres. In mesu a s'àrea b'at àpidu una deviatzione de Terranova chi at ispiatzadu su portieri suo. Pro non bastare Farias nche marcat fintzas su de bator. Tiru dae su lìmite de s'àrea e botza a su segundu palu. Su portieri nieddu-birde non bi crompet e su Casteddu tròulat sa partida a vantàgiu suo. In sos ùrtimos 15 minutos su ritmu mènguat e gasi etotu sas ocasiones. Acabbat 4-3 pro sos sardos.
Como b'at a àere tempus pro meledare e pro pranificare su 2017. S'8 de ghennàrgiu at a èssere su turnu de su Milan in s'istàdiu de San Siro.
Formatziones
Casteddu: Rafael, Pisacane (66' Joao Pedro), Salamon, Bruno Alves, Capuano, Padoin, Di Gennaro, Dessena (40' Borriello), Barella, Farias, Sau (74' Giannetti).
Allenadore: Massimo Rastelli
Sassuolo: Consigli, Lirola (81' Matri), Antei, Acerbi, Peluso, Mazzitelli (81' Ricci), Sensi, Pellegrini, Adjapong (65' Terranova), Defrel, Ragusa.
Allenadore: Eusebio Di Francesco
Gol: 14' Sau, 29' Adjapong, 32' Pellegrini, 58' Acerbi, 63' Borriello, 73' Farias, 76' Farias
Espulsos: 34' Pellegrini
