 |
| Deretos lìberos. Url imàgine |
«Cun dolore fundudu, cumpàrgio pro informare a su pòpulu nostru, a
sos amigos de s'Amèrica nostra e de su mundu chi oe, 25 de santandria, a
sas 10.30 de note, s'est rèndidu su Cumandante a cabu de sa
Rivolutzione cubana Fidel Castro Ruz. Cunforma a sa voluntade espressada
dae su cumpàngiu Fidel, sa carena sua at a èssere cremada. In sas
primas oras de sàbadu 26, sa cummissione organizadora de s'interru at a
frunire a su pòpulu nostru sas informatziones detalliadas pro s'omàgiu
chi l'amus a tributare a su fundadore de sa Rivolutzione cubana. Fintzas
a sa vitòria!». L'at annuntziadu su presidente de sa Repùblica Raul
Castro, tràmite unu messàgiu televisivu.
Fidel teniat 90 annos e
in s'ùrtimu cungressu de su Partidu comunista aiat antitzipadu su
“turnu” suo: «Crompet pro totu cantos, luego apo a èssere che a sos
àteros». In cussa ocasione aiat sutalineadu chi «sas ideas de sos
comunistas cubanos ant a abarrare comente proa chi in custu praneta, si
si traballat meda e cun dignidade, si podent prodùere sos benes
materiales e culturales chi bisòngiant a sos èsseres umanos».
Ideas chi ant postu oriolos mannos a sos meres de cada genia peri su mundu
cada bia chi su gosu colletivu de una rivolutzione s'acareit a
s'istòria. Cun Fidel si nch'andat una de sas figuras prus mannas de su
'900, sèculu de assàrtios a su chelu e de derrutas. Brindent oe, sos
inimigos suos, sos chi ant gherradu contra a s'afrancamentu de sos
ùrtimos, contra a sa libertade dae su bisòngiu e dae s'ignoràntzia in
nùmene de una libertade chi nch'est conduende su mundu intreu a su
“turnu” suo.
Bivat s'esèmpiu de Fidel e s'atza de su pòpulu cubanu.
