A pustis de sa pàusa pro sas partidas de sas natzionale, su campionadu de Sèrie A torrat a cumintzare cun su disafiu intre Inter e Casteddu. Sas iscuadras sunt a sa de noe e a sa de deghe positziones in classìfica, a distàntzia de unu puntu.
Cumintzat sa partida e a su de chimbe minutos su Casteddu tenet giai un'ocasione bona pro nche colare in vantàgiu, ma s'incorrada de Ceppitelli nch'essit a foras. S'Inter paret prus dinàmica e est prus presente in sos tretos de Storari. A su de 24 minutos Bruno Alves nche ponet sa manu in sa cara de Icardi e s'àrbitru frùschiat unu tiru de penalidade pro sos lombardos. Est s'atacante nieddu-biaitu a si nde ocupare de su tiru, ma nche frundit s'ocasione. Sa botza, sena resurtu, nche colat a filu de terra a curtzu de su palu de dereta. Sos milanesos ant un'àtera paja de ocasiones pro nche marcare s'1-0, ma sa defensa casteddaja amparat bene su portieri.
Bella s'ocasione de su Casteddu a su de 48 minutos. Di Gennaro in contratacu chircat de nche collocare s'isfera in su segundu palu cun su mànchinu, ma su tiru nch'essit addae de sa lìnia de fundu. Sos sardos si repitent a su de 54 minutos, ma Handanovic est superlativu duas bortas: in su tiru de Sau e in su de Melchiorri. Nche colant petzi duos minutos e arribat su vantàgiu de sos nieddu-biaitos. Est João Mário su marcadore. Su Casteddu però non si rendet e andat a curtzu a su parègiu cun Di Gennaro. Fintzas inoghe Handanovic est miraculosu e sarvat su resurtadu. A su de 71 minutos arribat su parègiu de sos òmines de Rastelli. Sa botza movet dae sos pees de Di Gennaro chi nche la ponet in sos de Melchiorri. S'atacante si l'acontzat cun su carcàngiu e nche la ponet in intro de sa porta paregende sos contos. A su de 82 minutos Melchiorri tenet s'ocasione pro sa dopieta, ma s'operatzione no li resesset. A sorpresa a su de 85' minutos arribat su vantàgiu de sos sardos. Melchiorri belle in sa lìnia de fundu faghet mòvere unu passàgiu traessu ma sa botza corfat a s'anca de Murillo e arribat a sos tretos de su portieri chi si nche la tragat a intro. Su Casteddu est animosu e cun Isla proat a otènnere su de tres, ma su portieri aversàriu custa borta est prontu. Bator minutos de recùperu non sunt bastantes a sos interistas pro nche cròmpere a su parègiu. Acabbat 1-2 pro sos ruju-biaitos. Sos sardos nche bolant a su de sete postos in classìfica.
Formatziones
Inter: Handanovic, Ansaldi (80' Jovetic), Miranda, Murillo, João Mário, Medel, Candreva (74' Eder), Banega (60' Gnoukouri), Perisic, Icardi.
Allenadore: Frank de Boer
Casteddu: Storari, Pisacane, Ceppitelli, Bruno Alves, Murru, Padoin, Tachtsidis, Munari (69' Isla), Di Gennaro (77' Barella), Melchiorri, Sau (60' Borriello).
Allenadore: Massimo Rastelli
Gol: 56' João Mário, 71' Melchiorri, 85' Handanovic (auto-gol)
