Partida difìtzile oe in su Juventus Stadium. Sos campiones de Itàlia in càrriga cherent torrare a cumandare sa classìfica a pustis de sa derrota contra a s'Inter de domìniga. A s'àtera ala su Casteddu devet cunfirmare su momentu bonu, cunsiderende finamentas chi non sunt custas sas partidas de bìnchere pro conchistare sa permanèntzia in Sèrie A. Ma si carchi puntigheddu arribat est semper su bene bènnidu.
Sos torinesos movent deretu a s'atacu. Higuain andat a curtzu a su vantàgiu, ma Storari essit e parat. Sa resistèntzia de sos casteddajos non durat meda. A su de 14 minutos sos òmines de s'ex Allegri nche marcant su vantàgiu. Pjanic nche ponet una bella botza in sos pees de Higuian chi tirat a corfu seguru, Storari respinghet cun unu miràculu, ma s'isfera nche crompet a sos pees de Rugani chi nche l'arrumbat a intro. Sos sardos proant a rispondere, ma sa Juventus dat s'impressione chi non si chèrgiat firmare. A pustis de binti minutos arribant àteros duos gol. Unu a su de 33 minutos cando Higuain intervenet in una respinta de Storari e s'àteru ses minutos a pustis dae unu tiru dae su cugione de Pjanic. In s'addòviu cun sa botza b'est puntuale Dani Alves chi nche marcat su de tres. Pagos minutos e totus a s'ispogiatoju pro sa pàusa.
In su segundu tempus, sos biancu-nieddos, fortes de su vantàgiu conchistadu, controllant sa partida cun cuntratacos repentes. Su Casteddu podet petzi abbaidare, in s'ìnteri sos piemontesos sighint a fàghere mòvere sa botza dae una banda a s'àtera de su campu. Sa partida paret chi no tèngiat prus nudda ite nàrrere. Sos sardos afrontant su segundu tempus cun una passividade chi non benit bene a lu nàrrere. In sos minutos chi abarrant b'at galu tempus pro unu gol. Est Ceppitelli, sena lu chèrrere a nch'ispìnghere sa botza a intro de sa porta sua. Su tiru de Lemina, paradu dae Storari, torrat in segus e rimbaltzat in su ghenugru de su defensore umbru chi non podet evitare s'àuto-gol. Sa Juventus sighit a atacare, ma acabbat 4-0. Partida a sensu ùnicu, de nch'ismentigare.
Mègius a pensare a sa partida de lunis in Casteddu contra a sa Sampdoria.
Formatzione
Juventus: Buffon (46' Neto), Rugani, Barzagli, Chiellini, Dani Alves, Lemina, Hernanes, Pjanic, Alex Sandro, Dybala (72' Pjaca), Higuain.
Allenadore: Massimiliano Allegri
Casteddu: Storari, Bittante, Ceppitelli, Bruno Alves, Murru, Barella, Di Gennaro, Padoin, Joao Pedro (46' Tachtsidis), Borriello (46' Giannetti), Sau (68' Munari).
Allenadore: Massimo Rastelli
Gol: 14' Rugani, 33' Higuain, 39' Alves, 84' Ceppitelli (àuto-gol)
