Su Casteddu, a pustis de sa trasferta contra a sa Juventus tenet bisòngiu de tres puntos pro si nch'istesiare dae sa zona caente de sa classìfica. Sa Sampdoria imbetzes at pèrdidu sas ùrtimas tres partidas e cheret furriare issa puru conca a sos tres puntos.
Sos òmines de Rastelli cumintzant bene cun duas ocasiones pro Sau e Murru, posca, a bellu a bellu, su giogu si nche tramudat mescamente a su tzentru de su campu. A su de 16 minutos sa Sampdoria proat a prodùere agigu de possessu. Quagliarella si faghet a bìdere in sos tretos de s'estremu defensore ruju-biaitu, ma Ceppitelli li firmat sa giogada. A su de 25 minutos Cigarini proat a nch'ischidare a Storari cun unu tiru dae a tesu, ma sa trajetòria est tzentrale e su portieri lu deviat a foras de sa traessa. A su de 33 minutos, in un'interventu cun Muriel, su portieri pisanu s'istròpiat (sa prima diàgnosi faeddat de distorsione) a su ghenugru e nch'essit dae su campu in càmbiu de Rafael. A su de 37 minutos su Casteddu torrat a bida. Padoin li nche furat sa botza a Pereira e si nche fuet conca a su ladus mànchinu de sa lìnia de fundu. Nche ghetat a mesu sa botza pro sos pees de Joao Pedro chi nche la devet petzi ispìnghere a intro.
In sa segunda fratzione de giogu sos sardos parent prus in forma, difatis si nch'acarant prus de una bia a s'àrea de Viviano. Fintzas sa defensa casteddaja cumbinchet de prus cunforma a su disafiu de mèrcuris coladu in Torinu. Sos sardos controllant sos ritmos de sa partida e cando podent movent in contratacu mescamente cun Joao Pedro e Padoin. Cando sa gara pariat aviada a si nch'acabbare cun unu gol ebbia, nd'arribant àteros duos. In contratacu sa Sampdoria nche crompet a su parègiu cun Fernandes chi si nche presentat cara a Rafael e nche lu bàrigat cun unu tiru a filu de terra. Rastelli protestat e s'àrbitru nche lu bogat. Su 2-1 de su Casteddu però arribat deretu a su de 88 minutos. S'autore est Melchiorri chi, semper in contratacu, retzit unu donu mannu dae Viviano chi essit a bòidu dae s'àrea. S'atacante casteddaju, a porta lìbera, nche marcat su primu gol personale in Sèrie A. In sos minutos de recùperu sos lìgures atacant a conca bassa pro agatare su parègiu, ma non b'at prus tempus. Sos sardos cun sa vitòria in butzaca si nch'andant a sete puntos in classìfica.
Formatziones
Casteddu: Storari (33' Rafael), Murru, Bruno Alves, Ceppitelli, Pisacane, Isla, Tachtsidis, Padoin, Joao Pedro (83' Barella), Sau (74' Melchiorri), Borriello.
Allenadore: Massimo Rastelli
Sampdoria: Viviano, Regini, Skriniar, Silvestre, Pereira (75' Budimir), Linetty, Cigarini, Praet (80' Fernandes), Alvarez, Muriel (55' Schick), Quagliarella.
Allenadore: Marco Giampaolo
Gol: 37' Joao Pedro, 86' Fernandes, 88' Melchiorri
