In sa die de sas polèmicas de sos Sconvolts contra a Storari, su Casteddu a s'Atalanta nde li faghet tres. A borta de die in sas tribunas de su Sant'Elia est cumpartu unu fògiu chi criticaiat su cumportamentu de s'estremu defensore ruju-biaitu in sas ùrtimas partidas. «...cussu mertzenàriu de Marco Storari non devet prus giogare cun sa fasca de capitanu...» - naraiat su documentu firmadu dae sa tifoseria organizada de sos Sconvolts. Ma colemus·nche a sa crònaca de giogu.
Sos pitzocos de Rastelli cumintzant bene deretu. A su de oto minutos Borriello nche marcat su vantàgiu. Dae su ladus de manca Joao Pedro nche ponet in mesu de s'àrea unu passàgiu traessu e s'atacante napoletanu devet petzi istèrrere s'anca de dereta pro nche l'arrumbare a intro. Sos bergamascos faghent possessu, ma non resurtant a agatare su passàgiu detzisivu. A su de 35 minutos però ant s'ocasione pro nche torrare a pare sa partida, ma Paloschi si faddit su tiru de penalidade pro neghe de Rafael chi bi lu parat. S'àrbitru bi l'aiat cuntzessu pro unu fallu de Pisacane a Gomez.
In su segundu tempus su Casteddu non perdet tempus e raddòpiat. Custa borta su passàgiu traessu movet dae dereta dae sos pees de Isla. Sa botza est pretzisa pro Sau chi cun unu tiru a filu de terra nche la còllocat a curtzu a su palu de manca. In antis de sa de tres su Casteddu leat fintzas unu palu cun Marcu Sau. Tres minutos a pustis, imbetzes, arribat su de bator gol in campionadu de Borriello. S'atacante òperat unu tiru lìberu chi, fintzas cun sa complitzidade de su portieri aversàriu, nch'intrat in su primu palu. In antis de s'acabbu b'at carchi àtera ocasione ma perunu gol. Sos sardos conchistant sos primos tres puntos de s'istajone. Mèrcuris conca a Torinu pro disafiare a sa Juventus.
Formatziones
Casteddu: Rafael, Pisacane (78' Bittante), Ceppitelli, Bruno Alves, Murru, Padoin, Tachtsidis, Isla (83' Munari), Joao Pedro (63' Barella), Borriello, Sau.
Allenadore: Massimo Rastelli
Atalanta: Berisha, Toloi, Zucanovic, Masiello (46' D'Alessandro), Conti, Franck Kessié, Carmona (59' Grassi), Kurtic (56' Gagliardini), Konko, Paloschi, Gomez.
Allenadore: Gian Piero Gasperini
Gol: 8' Borriello, 56' Sau, 73' Borriello
