A pustis de su parègiu internu contra a sa Roma, su Casteddu fiat in chirca de cunfirmas, ma sos tres puntos si nche sunt andados conca a Bologna. Sos pitzocos de Donadoni, avantagiados fintzas dae sa superioridade numèrica, ant raddopiadu su puntègiu e ant sufertu in sos ùrtimos minutos. Su resurtadu però est arribadu gasi etotu.
In sos primas binti minutos sas iscuadras cumintzant a leare tretu e sunt che pare. Su vantàgiu de sos emilianos arribat a su de 23 minutos cun Verdi. S'atacante nche marcat su gol dae unu tiru lìberu: sa botza nche bàrigat sa barriera, rimbaltzat in dae in antis a Storari e nch'intrat a intro. Su portieri casteddaju carchi neghe la tenet. Su Bologna leat in manu sa partida e controllat bene su resurtadu finas a s'intervallu.
In su segundu tempus, a pustis de oto minutos, sos sardos abarrant in deghe pro s'espulsione de Storari chi, cun sas manos, tocat sa botza in foras de s'àrea. Su giogu dae como in susu cumintzat a èssere partzidu dae sos càmbios e a su de 74 minutos arribat fintzas su raddòpiu de sos òmines de Donadoni. Di Francesco isfrutat su bellu traballu de Krejci chi nche brincat duos defensores e nche ponet sa botza a mesu pro s'atacante chi nche l'ispinghet a intro sena perunu problema. Su Casteddu ismesat s'isvantàgiu a su de 83 minutos cun Bruno Alves chi isfrutat unu tiru lìberu. S'ischìtzina nch'intrat in su cugione a cusrtzu a su palu. Inoghe est Da Costa a èssere pagu atentu. In sos ùrtimos minutos sos casteddajos proant a chircare su parègiu, ma su tempus est pagu e acabbat 2-1 pro sos meres de domo.
Formatziones
Bologna: Da Costa, Krafth, Oikonomou, Gastaldello, Masina (76' Torosidis), Taider, Nagy (86' Viviani), Dzemaili, Verdi, Destro (68' Di Francesco), Krejci.
Allenadore: Roberto Donadoni
Casteddu: Storari, Isla, Salamon, Alves, Murru (66' Tachsidis), Ionita, Di Gennaro, Padoin, Barella (56' Rafael), Sau (73' Farias), Borriello.
Allenadore: Massimo Rastelli
Gol: 23' Verdi, 74' Di Francesco, 83' Alves
Espulsos: 53' Storari
