Su Casteddu binchet sas prima partida de su torneu Maspalomas in sa Grandu Canària. Su triangulare, chi a su sòlitu si giogat in su mese de ghennàrgiu, ocannu mudat mese e bidet sa partetzipatzione de Marìtimo e de Las Palmas. S'annu coladu su torneu l'at bìnchidu su Psv Eindhoven.
Sos sardos in sa partida cun su Maritimo si sunt ammustrados cuncretos e tzìnicos, aprofitende de totu sas ocasiones prus importantes. A su de tres minutos, difatis, sunt giai in vantàgiu cun Barella chi nche collit unu passàgiu traessu de Ionita. Su giogadore casteddaju no at perunu problema a nch'insertare sa botza a sa rete. Sos giogadores de Rastelli in su campu si movent mègius e a su de 38 minutos raddòpiant agiuados dae su portieri aversàriu. Charles essit a bòidu e Arras nd'aprofitat marchende·nche su 0-2.
In su segundu tempus sos cumponentes de sas duas iscuadras mudant belle totus e finas su ritmu mènguat. B'at petzi un'àtera paja de ocasiones dae ambas bandas, ma sena perìgulu. Non càpitat prus nudda finas a s'acabbu.
Custu sero a sas noe e mesa de sero pro sos sardos b'at a èssere su segundu apuntamentu cun sa partida intre Las Palmas e Casteddu chi at a detzìdere su binchidore de su torneu.
Formatziones
Casteddu: Storari, Padoin (46’ Pisacane), Ceppitelli (46’ Krajnc), Salamon (46’ Bruno Alves, 82’ Vasco Oliveira), Murru (46’ Capuano), Tetteh (75’ Pennington), Di Gennaro (46’ Munari), Ionita (46’ Deiola), Barella, Joao Pedro (6’ Arras), Sau (46’ Pajac).
Allenadore: Massimo Rastelli
Maritimo: Charles (46' Haghighi), Patrick (58' Coronas), Deyvison, Dirceu, China, Jean Cleber, Fransergio (70' Brito), Alex Soares (65' Xavier), Samuel (67' Ghazaryan), Gevaro (68' Esquerdinha), Baba (67' Djoussè).
Allenadore: Paulo Cesar Gusmao
Gol: 3’ Barella, 38’ Arras.
