 |
| Deretos ilfattoquotidiano.it. Url imàgine |
Est prevìdidu pro custu mangianu su primu isbarcu de una chimbantina de emigrantes in s'aeroportu de Su Masu. At a èssere su primu de tres trasportos chi nch'at a batire 135 pròfugos dae Vintimìllia a Sardigna.
Su de duos aèreos at a arribare semper a s'aeroportu de sa provìntzia de Casteddu e su de tres, domìniga, a s'Alighera. Sa cuestura e sa prefetura sunt giai organizende·si pro partzire sas cuotas in sas istruturas de s'ìsula chi nch'at giai barigadu su nùmeru totale pre-istabilidu.
Sas protestas no ant isetadu a cumpàrrere, mescamente dae banda de sa polìtica de tzentru-dereta e dae unos cantos sìndigos. Su coordinadore Cappellacci at pedidu s'interventu deretu de sa Regione a manera chi si fatzat craresa cun su guvernu italianu.
Totus ant faeddadu de òrdine pùblicu, de seguresa, de disponibilidade a s'ospitalidade, ma nemos at faeddadu de tràmuda de èsseres umanos. Pessones carradas dae un'ala a s'àtera de su Mediterràneu, òrfanas de su deretu prus mannu e prus importante chi bi potzat èssere. Sa libertade. Su de èssere lìberos e de si fraigare unu benidore nou in cale si siat ala de su mundu, s'autonomia de pòdere andare a s'Europa de su nord a chircare sos parentes e a cumintzare unu benidore nou in pare cun issos.
Nono, deretu negadu. E si giai Vintimìllia lis fiat istrinta, figuremus·nos ite bi potzant fàghere in Sardigna, logu ispèrdidu in ue non nche diant chèrrere istare e logu dae in ue si nche diant chèrrere andare sena lu pòdere.
