In custas primas fases de campionadu su Casteddu resurtat a si nche leare unu puntu. In una partida echilibrada sa Roma isfrutat mègius sas ocasiones ma su Casteddu ponet òrdine a sas ideas e otenet unu parègiu meritadu.
Movent bene sos grogu-rujos. A su de ses minutos s'àrbitru lis cuntzedet deretu unu tiru de penalidade. Isla l'at paradu su pee a El Shaarawi chi nche fiat in pessu intradu a s'àrea. Perotti trasformat e nche giughet a su vantàgiu sos suos. A su de 12 minutos sos òmines de Spalletti ant sa possibilidade de raddopiare, ma su tiru de Salah nch'essit a pagu tretu dae su palu defensadu dae Storari. Su Casteddu chircat de nche bogare sa conca a foras e in carchi ocasione proat a dare anneu a sos romanos. A su de 36 minutos Borriello si nche presentat cara a su portieri aversàriu, chircat de piatzare sa botza, ma Szczesny la respinghet cun sos pees. S'ocasione prus manna però arribat a su de 44 minutos, cando s'atacante si nche ghetat a pische pro intertzetare unu passàgiu traessu de Di Gennaro, ma sa botza corfat a su palu e torrat in segus. Su primu tempus non nos donat àteras emotziones.
In sa segunda fase de sa partida sa Roma raddòpiat deretu cun Strootman chi iscràbigat a porta s'isponda de Dzeko. 0-2. Nche colant belle deghe minutos e Borriello ismesat su vantàgiu. Su tiru de Sau, respintu dae Szczesny nche crompet a sos pees de s'atacante casteddaju chi nche marcat s'1-2. Sos sardos parent postos mègius in campu e chircant de fàghere mòvere sa botza pro fraigare unu giogu dèghidu. Sos òmines de Spalletti imbetzes sunt perigulosos in sos contratacos. Dzeko e Bruno Peres bi proant in paritzas ocasiones, ma Storari est superlativu. In sos ùrtimos minutos, a su de 88, arribat su parègiu. Su passàgiu traessu de Isla nche ruet pròpiu in sa conca de Sau chi la tocat su chi bastat pro frigare a su portieri. Est su parègiu. In sos minutos de recùperu sa Roma si nche ghetat a dae in antis, ma non b'at prus tempus. Unu puntu peròmine.
Su campionadu si firmat pro lassare logu a sas natzionales. S'11 de cabudanni b'est Bologna-Casteddu.
Formatziones
Casteddu: Storari, Murru, Bruno Alves, Salamon, Isla, Padoin (71' Giannetti), Di Gennaro, Ionita, Barella (79' Deiola), Sau (91' Munari), Borriello.
Allenadore: Massimo Rastelli
Roma: Szczesny, Peres, Vermaelen, Manolas, Florenzi, Strootman (79' Paredes), De Rossi, Nainggolan, El Shaarawi (46' Dzeko), Perotti (64' Fazio), Salah.
Allenadore: Luciano Spalletti
Gol: 6' Perotti, 46' Strootman, 56' Borriello, 88' Sau
