In s'ùrtima proa de sas amichèvoles istadiales, su Casteddu otenet unu parègiu bonu. Giai dae sa chida chi intrat sas fainas s'ant a fàghere prus sèrias, cun sa Copa Itàlia. Dae sa partida contra a s'Hamburger SV nch'at essidu propòsitos bonos pro s'istajone imbeniente.
Cumintzant bene ambas sas iscuadras, ma sunt sos tedescos a si nch'acostiare pro primos a s'àrea defensada dae Storari. Wood si nche presentat cara a su portieri ruju-biaitu chi però non si lassat frigare e sarvat su resurtadu. Sunt sos sardos a nche colare in vantàgiu a su de 13 minutos. Farias, cuntrastadu in s'àrea de penalidade, otenet su tiru dae sos ùndighi metros chi issu etotu fùrriat a gol. 1-0 pro su Casteddu. Non mancant sas ocasiones a un'ala e a s'àtera. Sos tedescos però paret chi mantèngiant mègius sa botza. A su de 34 s'Hamburger SV parègiat e lu faghet dae sos 11 metros cun Hunt.
Su segundu tempus perdet agigu in calidade a cajone de sos càmbios. Bi proant a cumbinare carchi cosa in dae in antis, ma a Hunt e a Borriello lis rispondent Rafael e Adler, semper subra de su fatu. In sos ùrtimos minutos sos ruju-biaitos si nch'acùrtziant a su gol de sa vitòria, ma su tiru de Barella iscudet a sa traessa e torrat in segus sena resurtu. Acabbat 1-1.
Apuntamentu a su 15 de custu mese a sas noe de sero cun su disafiu de Copa Itàlia contra a sa Spal.
Formatziones
Casteddu: Storari (46’ Rafael), Bruno Alves (46’ Pisacane), Salamon (46’ Ceppitelli), Krajnc (72’ Isla), Padoin, Di Gennaro (67’ Barella), Munari (63’ Tetteh), Ionita (85’ Deiola), Capuano, Borriello (78’ Arras), Farias (46’ Pajac).
Allenadore: Massimo Rastelli
Hamburger SV: Adler, Sakai, Cleber, Djorou, Ostrzolek, Ekdal (68’ Diekmeier)), Jung (46’ Muller), Hahilovic (46’ Gregoric), Hunt (85’ Porath), Kostic (68’ Waldschmid), Wood (85’ Lasogga).
Allenadore: Bruno Labbadia
Gol: 13’ Farias (p), 34’ Hunt (p).
