A pustis de oto meses de collàudos, sos trenos noos de sa Stadler, oe, ant mòvidu sos primos passos in sa lìnia ferrada intre S'Alighera e sa tzitade turritana. Sa flota de bator trenos prus pràticos, prus còmodos e prus seguros, at a sostituire sas automotritzes betzas ADe e ADm chi sunt in atividade dae prus de 60 annos.
Sas noas imbetzes, fabricadas in Isvìtzera, sunt biancas e rujas, tenent duos motores diesel Cummins de 6 litros cadauna e sa trasmissione diesel-elètrica. Nche podent cròmpere finas a 120 km/h de velotzidade e podent trasportare 186 passegeris.
Su biàgiu inaugurale est mòvidu custu mesudie conca a sa tzitade marina e est duradu pagu prus o mancu 35 minutos.
