 |
| Deretos auto.hwupgrade URL imàgine |
In Isvètzia, intro de su mese de maju ant prevìdidu sos primos esperimentos reales, in su caminu, de custa novidade. Ant fraigadu una corsia particulare longa 2 chilòmetros, a costàgiu de una super-istrada pùblica in s’oru a sa tzitade de Gävle. Su cuntzetu no est complicadu meda e aunit s’installatzione de lìnias aèreas eletrificadas, che pare a sas de sos trenos, e de pantògrafos de cuntatu subra sa cabina de sos càmios.
Su progetu est nàschidu in pare cun Scania, azienda de primore in contu de càmios a tratzione ìbrida, de motores e de tecnologias ligadas a su rispetu de s’ambiente. S’at a pòdere biagiare sena si firmare pro rifornire: custu est su chi si nche bidet a cudd’ala de làcana e custu est su chi s’isvilupu de sos mezos a elètricu at a pòdere batire cun sese. Semper chi sos espertos bi potzant reventire a lu pònnere in atu e a regime. Si diat abèrrere unu paradigma nou in contu de trasportos e forsis diat dare impèllida, apretende·los, fintzas a sos produtores de veturas.
 |
| Deretos auto.hwupgrade URL imàgine |
Unas cantas dies a oe, in Inghilterra, fiant faeddende de unu sistema automatizadu, sena cavos (wireless) pro carrigare sas veturas a elètricu a manera chi unu non si devat firmare pro carrigare sas baterias. Aiant pessadu a una croba magnètica intre bobinas interradas in s’asfaltu e àteras postas in su fundu de sas màchinas, fraighende gosi unas cantas corsias istradales in ue sos veìculos a elètricu diant pòdere carrigare in s’ìnteri chi sunt biagende, sena s’arressare in neddue.
Non diat èssere cosa mala o unu bisu ebbia, pro una regione che a sa Sardigna in ue su prus de sos trasportos est in manos a sos mezos gommados graes e lèbios. E semus chistionende de pertzentuales chi nche bàrigant su 90%! Mìgias de tonnelladas de mertze e milliones de chilòmetros cada die. In prus chi non de caminos de nch’acabbare o galu de progetare de bellu nou.
Diat chèrrere a bi pensare giai dae oe chi su progetu est in fase de esperimentu. E diat èssere de profetu chi su Guvernadore nostru, impinnadu dae cras, lunis 30 de maju, in Europa comente rapresentante de sas regiones italianas, cumintzet a nd’arresonare cun chie podet dispònnere su dinari. Pro bi pòdere pensare finas in logu nostru, conca a unu venidore prus sanu e conca a un’impreu semper prus bàsciu de sos idrocarburos. Custu diat èssere progressu, ma baddu si…
