Pranta cun unu nùmene antigu (Smilax aspera in latinu), forsis pre-romanu. Su teti est una de sas matas prus connotas in Sardigna ca s'agatat in totue. Acumpàngiat sos padentes de èlighe e ammuntat sos muros burdos de sos sartos, ma at fintzas propiedades de profetu.
Su teti est che a un'àrbore minore apilicadore, difatis sas lorighitas li permitint de si nch'arrocare in cale si siat sustegnu. Sas fògias sunt inghiriadas dae ispinas minudas e sos frores, chi s'aberint dae cabudanni a santandria, sunt arbos e birdes. In pare cun sos frores naschet fintzas su frutu, a budrone. Sos pupujones coghent colende dae su birde a su ruju.
Sos briones de sa mata si podent impreare in coghina comente a s'ispàragu, a pustis de los àere fatos buddire in abba. Bonas sas fritadas e sas insaladas.
Sa meighina populare, imbetzes, impreaiat sa pranta contra a su refriu, a sos reumatismos e a sas maladias de sa pedde. Sunt nòdidas sas propiedades depurativas, diurèticas, anti-asmàticas, tònicas e diaforèticas.
