Su Casteddu at bìnchidu sa Serie B. S'obietivu de su primu postu fiat de prestìgiu e sos ruju-biaitos non si l'ant lassadu fuire. Su campionadu est acabbadu belle pro totus francu pro sas iscuadras chi devent ancora giogare sos isparègios pro nche pigare a Serie A (Trapani, Pescara, Bari, Cesena, Spezia e Novara) e pro non nche calare a Lega Pro (Salernitana e Lanciano). Tres iscuadras, imbetzes, sunt cundennadas a torrare in segus de una categoria: Como, Modena e Livorno.
Sa partida, in s'istàdiu Silvio Piola, est animosa meda giai dae sos primos minutos. Su Casteddu si nche ghetat a dae in antis e a su de tres minutos est giai in vantàgiu. Di Gennaro aprontat unu tiru lìberu dae su lìmite de s'àrea e, cun su mànchinu suo, pintat una trajetòria chi non lassat iscampu a Pigliacelli. Sa botza nch'intrat in sa rughe de sos palos. Nche colant petzi una paja de minutos e sa Pro Vercelli parègiat. Castiglia, palas a sa porta defensada dae Rafael, furriende·si a sa lestra e tirende a bolu, nche marcat su gol de s'1-1. Bellu su movimentu de s'atacante e bellu su gol. Sos portieris sunt protagonistas a su de 13 e a su de 35 minutos. In antis Rafael respinghet a su cugione unu tiru de Marchi e a pustis est Pigliacelli a si opònnere a unu tiru dèbile de Pisacane.
In su segundu tempus sos piemontesos leant metros e giogant agigu mègius ma sena pònnere in pensamentu sa defensa casteddaja. A ambas sas iscuadras paret chi lis bastet su parègiu, ma est pròpiu como, a su de 84 minutos, chi arribat su vantàgiu definitivu de sos sardos. Sau nche collit una botza in intro de s'àrea e la trasformat in una bitzicleta chi non li permitit a su portieri nemmancu de si tzirigare. S'atacante tonaresu nche serrat su campionadu suo in bellesa cun 10 gol. In sos ùrtimos minutos sos arbos de Foscarini proant a paregiare, ma Rafael sarvat su resurtadu.
Su Casteddu nche torrat a Serie A, categoria chi li deghet, e cumintzat a progetare su benidore. Pro sa prima borta in s'istòria sua at bìnchidu su campionadu de Serie B, arribende in dae in antis a totus.
Pro nois de sa gazeta est istadu unu praghere mannu a sighire custa aventura fubalìstica chi si nch'est acabbada in sa mègius manera possìbile. Torramus gràtzias a totu sos sighidores nostros e rinnovamus s'invitu a nos lèghere fintzas pro s'istajone 2016/2017, in Serie A.
Formatziones
Pro Vercelli: Pigliacelli, Coly, Mammarella, Legati, Germano, Scavone, Ardizzone (23' Emmanuello), Budel (90' Sprocati), Castiglia, Marchi (71' Beretta), Mustacchio.
Allenadore: Claudio Foscarini
Casteddu: Rafael, Salamon, Pisacane, Capuano, Murru (71' Barreca), Deiola, Di Gennaro, Fossati (56' Tello), Joao Pedro, Giannetti (63' Cerri), Sau.
Allenadore: Massimo Rastelli
Gol: 3' Di Gennaro, 5' Castiglia, 84' Sau
