Fintzas su Casteddu istacat su billete pro nche pigare a Serie A. Sa vitòria de eris contra a su Bari lis permitit a sos sardos de prenotare unu postu in su campionadu majore. In prus, b'at de nàrrere chi mancant ancora duas giorronadas pro su sigillu ufitziale a su primu postu..
Movent bene sos òmines de Camplone. In sos primos minutos creant un'ocasione de importu cun unu corfu de conca de Maniero, ma su tiru est tzentrale e Storari respinghet sa botza. A pustis de paritzos tentativos, su gol arribat cun Joao Pedro chi nch'istichit a intro unu tiru dae su lìmite de s'arcu de penalidade. 1-0. Su Casteddu amministrat bene sa partida e si defensat bene. Storari est protagonista in medas ocasiones. Su raddòpiu est arribadu a su de 48 minutos cun Farias. Sa de tres l'at marcada Cerri a su de 87 minutos serrende·nche sa partida de su totu.
Sa crònaca est belle nudda cunforma a su traguardu conchistadu dae sos ruju-biaitos. B'est ancora sa possibilidade de nch'acabbare su campionadu a su primu postu. Tocat de las bìnchere totus e tocat de isperare chi su Crotone pòngiat su pee a tortu. Mancari su girone de torrada non siat istadu a su chentu pro chentu su giudìtziu totale est prus chi non bonu. Mescamente si cunsideramus chi s'iscuadra at sufertu infortùnios meda.
Como tocat de abbaidare conca a su benidore pro chircare de fraigare un'iscuadra chi siat a tretu de afrontare sos disafios de sa Serie A in sa manera mègius. Sas finàntzias non mancant e nemmancu sos progetos. Istemus a bìdere.
Formatziones
Bari: Micai, Tonucci, Di Cesare, Gemiti, Defendi, Lazzari (58' Dezi), Valiani, Romizi (71' Puscas), De Luca, Rosina, Maniero (65' Sansone).
Allenadore: Andrea Camplone
Casteddu: Storari, Pisacane, Murru, Capuano, Ceppitelli, Joao Pedro, Fossati, Di Gennaro (83' Salamon), Deiola, Farias (71' Tello), Giannetti (58' Cerri).
Allenadore: Massimo Rastelli
Gol: 24' Joao Pedro, 48' Farias, 87' Cerri.
