Su Casteddu at sa possibilidade de nche torrare a cumandare sa classìfica bidu chi su Crotone, in s'antìtzipu de sàbadu, at pèrdidu contra a su Cesena. Su Como, imbetzes, ùrtimu in classìfica a sa sola, podet petzi isperare chi sas aversàrias pro sa sarvesa non fatzant puntos.
Cumintzant bene ambas sas iscuadras e sos sardos no istentant a balangiare metros de campu e a pònnere anneu a Scuffet. Su Casteddu tenet ocasiones meda cun Munari, Sau e Giannetti, ma totus tres nch'indiritzant sa botza a foras. A su de 19 e a su de 25 minutos bi proat fintzas su Como, ma sos ruju-biaitos si sarvant. A su de 41 minutos, imbetzes, cun unu tiru dae su cugione arribat su vantàgiu de sos òmines de Rastelli. Fossati òperat su passàgiu traessu a mesu de s'àrea e Deiola, cun un'iscadriada nche la ponet in intro de sa porta.
Su segundu tempus imbetzes est de marca biaita. Su Como divenit perigulosu giai in sos primos minutos cun Bessa. Su destru de su giogadore comascu, però, lu respinghet sas manos de Storari. A su de 66 minutos arribat su parègiu de Cristiani. Bessa òperat unu passàgiu traessu e su tzentrocampista de Livorno dèviat sa botza in gol. Parègiu. In sos ùrtimos minutos de giogu su Casteddu proat a torrare in vantàgiu, ma Giannetti e Cerri no ant sorte bona. Su Como istringhet sas dentes e si nche leat unu puntu chi però at a serbire pagu a sa classìfica.
Sos sardos imbetzes si nch'acòstiant a su Crotone e abarrant in su segundu postu, a duos puntos. B'at ancora chimbe partidas de giogare e sàbadu a su Sant'Elia arribat su Lanciano.
Formatziones
Como: Scuffet, Casasola, Giosa, Ambrosini, Cech (54' Marconi), Cristiani (89' Brillante), Bessa, Basha (31' La Camera), Madonna, Lanini, Ganz. Allenadore: Stefano Cuoghi
Casteddu: Storari, Murru, Capuano, Ceppitelli, Balzano, Munari (64' Cinelli), Deiola, Fossati (82' Di Gennaro), Tello, Giannetti, Sau (68' Cerri). Allenadore: Massimo Rastelli
Gol: 41' Deiola, 66' Cristiani
