Cun su Vicenza non b'at iscusas. Sos tres puntos devent mòvere conca a Casteddu. Sa sèrie negativa de bator partidas sena vitòria devet acabbare. Sos biancu-rujos, a su matessi tempus, tenent istìmulos mannos, sunt gherrende pro non nche calare a Lega-Pro.
Ambas sas iscuadras cumintzant a passu lentu, s'istùdiant e produent pagu giogu. Forsis b'est sa timòria de torrare a faddire sa partida. Sos sardos,repitimus, crompent dae bator partidas sena vitòria e sos vènetos sunt noe giorronadas chi non binchent. Ocasiones non si nde bidet, francu unu tiru de Farias chi Benussi resesset a blocare sena problemas.
A su de 42 minutos però sa partida mudat in favore de sos casteddajos. Sos òmines de Lerda abarrant in 10 pro s'espulsione de Pinato, giai ammonidu. Su Casteddu, como, cun un'òmine in prus, tenet sa possibilidade de nd'aprofitare, ma non b'at tempus. S'àrbitru nch'imbiat ambas iscuadras a si pasare.
Su segundu tempus est de marca ruju-biaita. Su Casteddu, mudende registru, si dat a pressare semper de prus e, a pustis de unos binti minutos, Cinelli nche marcat su vantàgiu. Su giogadore romanu nche collit unu passàgiu traessu de Melchiorri e nch'istichit sa botza a intro de sa rete: 0-1. Ma tocat de mantènnere s'atentu. Su Vicenza est ancora biu e sos atacantes, pro nudda rèndidos, li proant sos chircos a sa defensa de Rastelli. A su de 90 minutos però arribat su tiru chi nch'isperdet totu sas isperas de sos biancu-rujos. Melchiorri, a pustis de nch'àere brincadu a Ligi, si presentat cara a su portieri e cun unu destru sicu l'intzegat sinnende su 0-2. Su giogadore de Trèia festat in sa mègius manera su rinnovu de su cuntratu. Sos chimbe minutos de recùperu nche colant in presse. Su Casteddu binchet.
Pro como sos sardos si godint su primu postu, fintzas chi non giogat su Crotone in su postìtzipu de cras cun su Pescara.
Formatziones
Vicenza: Benussi, Sampirisi, Ligi, Adejo, Pinato, Bellomo (73' Raicevic), Moretti, Vita (81' Sbrissa), Laverone, Galano (45' Signori), Ebagua.
Allenadore: Franco Lerda
Casteddu: Storari, Murru, Salamon, Ceppitelli, Pisacane, Tello (46' Melchiorri), Fossati, Cinelli, Joao Pedro (60' Munari), Farias, Sau (81' Krajnc).
Allenadore: Massimo Rastelli
Gol: 66' Cinelli, 90' Melchiorri
Espulsos: 43' Pinato
