 |
| Deretos Pixabay. Url imàgine |
Sa noa de is dies coladas fiat sa de su
biàgiu de Obama a Cuba. Una noa in cada sensu, a dae chi su presidente a
isteddos e istrìscias fiat su primu, in 88 annos, a ddoe fàghere unu
brincu. Paghe amighèntzia, netzessidade de caminare a manu tenta conca a
su tempus venidore «ca - at naradu s'incuilinu de sa Domo arva - semus totu americanos». Su fallimentu de s'embargu econòmicu est torradu a essire a campu: «Apo pedidu a su Cungressu nostru de nche ddu bogare».
Ma est petzi una furriada tàtica conca a sa matessi istrategia: est a
nàrrere a nch'insertare s'ìsula caraìbica a intro de sa guarnissa
econòmica de màdrighe liberale. Custu tipu de normalizatzione est cherta
finamentas dae Donald Trump, su candidadu a sa ghia republicana pro is
presidentziales de s'atòngiu imbeniente. S'idea est de nche fraigare in
S'Avana unu hotel «cando at a èssere possìbile». Ma in Cuba ddoe at chie chistionat de perìgulos pro sa rivolutzione.
Nointamen
su guvernu cubanu apat naradu chi is positziones antimperialistas non
nch'ant a intrare in sa mesa de is negotziados cun is Istados unidos, sa
rete de is Giòvanos anticapitalistas, nàschida in su mese de
ghennàrgiu, at emìtidu unu comunicadu cun 4 puntos: «Is solutziones
de Cuba no ant a essire a campu gràtzias a is polìticas istadunidenses;
su bene istare de is potèntzias tzentrales si basat subra de sa
povertade de is paisos suta-isvilupados; su capitalismu est incapatze de
ofèrrere libertade e felitzidade in manera permanente a totu is pòpulos
de su mundu; petzi tràmite sa radicalizatzione de su sotzialismu cubanu
nch'amus a essire cun dignidade dae sa crisi econòmica». S'organizatzione pedit de «pònnere in parte sa populatzione cubana» e punnat a sa «democratzia de base», a su «rispetu de is diferèntzias», a s'amparu de su «pensamentu crìticu», a sa «creatividade polìtica».
