 |
| Incarca subra de s'imàgine pro dd'ismanniare |
S'essida de Jeb Bush dae sa cursa
republicana no at favoridu is candidados chi, a bàtimas, sunt proende a
firmare sa martza lestra e grae de Donald Trump. In Nevada, pagas dies a
oe, su capotatzu nieddu at otènnidu prus de su 45% de is cunsensos
crompende·nche a 82 delegados. Ted Cruz e Marco Rubio abarrant in
segunda e in sa de tres positziones cun 17 e 16 delegados, de pare a
pare. S'ispera issoro est chi John Kasich e Ben Carson nàrgiant
"adiosu", sighende s'esèmpiu de Bush, de Mike Huckabee, de Rand Paul, de
Rick Santorum, de Chris Christie, de Carly Fiorina e de Jim Gilmore.
Ma, cara a is 14 cumpetitziones de su primu de martzu, ambos, Cruz e
Rubio, s'ant a gherrare s'unu contra a s'àteru pro pòdere nàrrere a sa
banda "moderada" de su partidu chi s'anti-Trump ddoe est. Ma finamentas
in su campu democràticu est a cumprèndere chie at a pòdere èssere, cara a
sa conchista de sa Domo arba, s'anti-Trump.
S'in casu chi "the
Donald" triunfaret in is primàrias de s'elefante, a rapresentare
s'aineddu ddoe at a bòlere unu chi pòngiat in s'agenda sa giustìtzia
sotziale o unu chi no assuconet is possidentes, in antis chi si fùrrient
a sa dereta prus agreste? Finas a imoe Bernie Sanders e Hillary Clinton
nche sunt, ambos, a 51 delegados, nointamen s'ex "first lady" apat
bìnchidu in Iowa e Nevada. Paret chi s'eletoradu giovanile sustèngiat su
"sotzialista de su Vermont": singiale de una crèschida de sa cussèntzia
contra a su poderiu islacanadu de is meres de s'economia chi non
garantint unu benidore sulenu a is generatzione noas. Pro parte sua,
Clinton, narat chi su programma de Sanders no est sustenìbile. A
nch'introduire unu sistema sanitàriu a s'iscandìnava, nât chi, bolet
nàrrere feti una cosa: a nch'artziare is tassas.
In su 2004 esseit a campu "Don't think of an elephant". In cussu libru su linguista istadunidense George Lakoff cussigeit a is democràticos de no impreare su matessi limbàgiu de is aversàrios. «Una bia chi George W. Bush nche crompeit a sa Domo arba, sa frase isgràvios fiscales nch'esseit dae in cue. Cando is faeddos tassas e isgràvios s'aunint su resurtu est una metàfora: is tassas sunt una tribulia. Chie nche ddas bogat est un'eroe. Deretu is democràticos ant impreadu cussos faeddos, iscudende·si su tzapu a pees». Imoe Clinton nch'est in intro de sa matessi guarnissa cuntzetuale de is republicanos, comente chi is tassas esserent unu male. Ca non chistionat de progressividade fiscale a sa manera de Sanders. Pro is matessi motivos, oe Lakoff narat chi s'eticheta "sotzialista" no at cajonadu dannos a s'imàgine de su senadore progressista, comente chi is valores suos siant valores americanos meros e sìncheros.
Tocat de cumprèndere si sa martza grae de s'elefante nieddu, pagu bajuladu finamentas dae is majorales de su partidu republicanu, at a cunditzionare is primàrias democràticas lassende·nche su pensu de Lakoff a banda. Is primàrias de s'aineddu imbenientes nos dd'ant a ammustrare.
In su 2004 esseit a campu "Don't think of an elephant". In cussu libru su linguista istadunidense George Lakoff cussigeit a is democràticos de no impreare su matessi limbàgiu de is aversàrios. «Una bia chi George W. Bush nche crompeit a sa Domo arba, sa frase isgràvios fiscales nch'esseit dae in cue. Cando is faeddos tassas e isgràvios s'aunint su resurtu est una metàfora: is tassas sunt una tribulia. Chie nche ddas bogat est un'eroe. Deretu is democràticos ant impreadu cussos faeddos, iscudende·si su tzapu a pees». Imoe Clinton nch'est in intro de sa matessi guarnissa cuntzetuale de is republicanos, comente chi is tassas esserent unu male. Ca non chistionat de progressividade fiscale a sa manera de Sanders. Pro is matessi motivos, oe Lakoff narat chi s'eticheta "sotzialista" no at cajonadu dannos a s'imàgine de su senadore progressista, comente chi is valores suos siant valores americanos meros e sìncheros.
Tocat de cumprèndere si sa martza grae de s'elefante nieddu, pagu bajuladu finamentas dae is majorales de su partidu republicanu, at a cunditzionare is primàrias democràticas lassende·nche su pensu de Lakoff a banda. Is primàrias de s'aineddu imbenientes nos dd'ant a ammustrare.
