Sa trasferta in Latina podet pàrrere perigulosa, ma sa paràula crae est “bìnchere”. Siat pro nche cantzellare sas ùrtimas prestatziones, agigu iscoloridas, e siat pro aumentare su distacu dae sa segunda in classìfica.
Rastelli si nche presentat cun una noa. Colombatto dae su primu minutu in càmbiu de Di Gennaro chi si pasat. Sa partida movet lena, ma prus colat su tempus e prus s'ànimat. Ambas sas iscuadras non timent a si nch'ammustrare in sos tretos de atacu. Sos ruju-biaitos bi proant cun Farias, ma Ujkani est atentu. Sa risposta de su Latina movet dae sos pees de Boakye, ma Storari resesset a respìnghere sa fusilada. Sos sardos ant prus lestresa in sos passàgios e sos tres atacantes, in dae in antis, Farias, Joao Pedro e Melchiorri, parent totu a unu. Paret die bona pro sos pitzocos de Rastelli, ma su gol no arribat.
Su segundu tempus tenet sa matessi imprenta de su primu, ma su resurtadu mudat. Barreca, dae su ladus de manca, nch'intrat a intro de s'àrea e indiritzat sa botza a Munari chi, a sa sola in dae in antis de Ujkani, nche l'ispinghet a intro. Su Latina poderat e chircat deretu su parègiu cun una bitzicleta de Dumitru, ma Storari bolat e parat. A su de 53 minutos su Casteddu raddòpiat. Joao Pedro agatat su passaditzu giustu pro Melchiorri chi, cun unu tiru a filu de terra, nche marcat su de duos. Sos òmines de Somma però sunt ancora bios e l'ammustrant deretu cun Mariga. A su de 57 minutos, su destru suo, dae 25 metros, si nch'istichit in sa rughe de sos palos, dende ispera noa a sos suos. 1-2. Sos sardos però nche cherent serrare su contu. Nche colat petzi unu minutu e dae sos pees de Joao Pedro movet su passàgiu detzisivu pro Melchiorri. S'atacante nche lu collit e, cun firmesa e fritesa, ispiatzat su portieri tirende a su segundu palu.
Su ritmu mènguat e sos latziales nd'aprofitant. Proant in cada manera a marcare sa de duas, ma Storari est in bonas e sarvat su resurtadu. A su de 71 minutos Salamon tocat sa botza cun sa manu in intro de s'àrea de penalidade e s'àrbitru li cuntzedet sa màssima punitzione. Tiru de penalidade. Bi pensat Corvia, ma su tiru iscudet a sa traessa e nch'essit a foras. Ocasione fulliada. B'at tempus pro carchi àtera emotzione, ma su resurtadu non mudat. Acabbat 1-3.
Sos ruju-biaitos ant ammustradu chi su giogu b'est e chi s'iscuadra est torrende a atzellerare conca a sa vitòria de su campionadu. Su Crotone imbetzes at paregiadu in Vertzelli, perdende duos puntos de importu. Como sa distàntzia intre sos sardos e sos calabresos est de tres puntos, ma non faghet a si dormire, sàbadu chi benit in su Sant'Elia b'est su Pescara.
Formatziones
Latina: Ujkani, Calderoni, Esposito, Brosco, Milani (55' Acosty), Boakye, Olivera, Mariga, Dumitru (61' Ammari), Corvia (78' Paponi), Schiattarella.
Allenadore: Mario Somma
Casteddu: Storari, Barreca, Ceppitelli, Salamon, Balzano, Cinelli, Colombatto (49' Di Gennaro), Munari (75' Tello), Joao Pedro, Melchiorri, Farias (81' Krajnc).
Allenadore: Massimo Rastelli
Gol: 47' Munari, 53' Melchiorri, 57' Mariga, 58' Melchiorri
