A pustis de paritzas dies de pàusa ierrile, sa Sèrie B si nche torrat a presentare in sos programmas de sos amantiosos de fùbalu. Est cumintzadu gianteris su girone de torrada chi in presse in presse nos donat su disafiu deretu intre Crotone e Casteddu. Sos sardos ant unu puntu in prus cunforma a sos calabresos, ma oe sos giogadores de Ivan Juric ant su vantàgiu de giogare in domo, cara a sos tifosos.
Mancu su tempus de cumintzare chi a su segundu minutu su Crotone nche colat a dae in antis. Dae su ladus de manca Stoian faghet mòvere unu passàgiu a mesu de s'àrea. Budimir arribat in tempus e nche marcat s'1-0. Como est totu in pigada pro sos sardos. Paret chi oe in s'istàdiu Ezio Scida sos ispetadores non siant pro nudda cascaviados. A cunfirmare custu sentidu bi pensat Farias, chi dae su lìmite de s'àrea de rigore tirat cun s'esternu destru e sinnat su parègiu. Su tiru a filu de su palu de manca lassat pagas isperas a su portieri chi, si nch'imbolat pro tènnere sa botza, ma non bi la faghet. Su Casteddu leat coràgiu e chircat de nche cròmpere a sos tretos de Cordaz faghende biagiare sa botza peri totu su terrinu de giogu. Su Crotone, a su matessi tempus, si nch'acherat paritzas bortas a s'àrea casteddaja, ma sena creare ocasiones chi potzant pònnere pensamentos a Storari. Cando sas iscuadras pariant giai prontas a tancare sa prima fase de giogu sos calabresos cun unu corfu de coa torrant in vantàgiu. Semper dae su ladus de manca Stoian cunsignat a sos pees de Martella una botza de oro. Su giogadore de Atri nche la devet petzi collocare a palas de Storari, e gasi faghet, sinnende su 2-1.
In su segundu tempus su Casteddu paret cumintzat bene, ma sa sorpresa est in cue, pronta a cunditzionare totu su restu de sa partida. Balzano, giai ammonidu, pigat un'àtera targhita groga e lassat sos suos in inferioridade numèrica. Si sa partida fiat in pigada, si podet nàrrere chi como sa pendèntzia siat aumentada. Su Crotone oramai gestit su giogu, si nch'impossessat de sa botza e, cun un'òmine in prus, manovrat bene sos ischemas, resurtende fintzas perigulosu. Su Casteddu paret ancora biu, ma non bastat. Sos òmines de Juric nche marcant fintzas sa de tres. Budimir si nche presentat cara a Storari e tirat a su segundu palu. Su portieri est bravu e respìnghere sa botza, ma deretu nche crompet Ricci chi, che corbu, nche l'arrumbat a intro de sa porta.
Sas emotziones però non sunt acabbadas. Krajnc tocat sa botza cun sa manu in intro de s'àrea. S'àrbitru non tenet dudas e cuntzedet a su Crotone su tiru de penalidade. Pro su giogadore islovenu imbetzes b'est sa targhita ruja. Como su Casteddu est in noe òmines.
De su tiru de penalidade si nde òcupat Salzano, intradu duos minutos in antis, ma Storari li serrat totu sos cugiones e parat. Oramai sa partida non tenet prus nudda de nàrrere, su ritmu mènguat e sos giogadores isetant petzi su frùschiu finale de s'àrbitru Maresca. Acabbat 3-1.
Pro sos sardos fiat s'ocasione pro ponnere passos in su caminu cara a sa Sèrie A e pro si nch'istesiare dae sa segunda in classìfica, ma sos pranos como si sunt mudados. Su mere nou de sa classìfica est su Crotone, rivelatzione bera de custa Serie B. Ma est chitzo pro intzertare comente si nch'at a tancare su campionadu, b'at ancora 20 giorronadas.
Formatziones
Crotone: Cordaz, Yao, Claiton, Ferrari, Balasa, Capezzi, Barberis (75' Salzano), Martella, Ricci (81' De Giorgio), Budimir, Stoian (85' Palladino).
Allenadore: Ivan Juric
Casteddu: Storari, Balzano, Salamon, Krajnc, Pisacane, Munari (72' Cerri), Di Gennaro (62' Tello), Fossati, Joao Pedro, Giannetti (56' Murru), Farias.
Allenadore: Massimo Rastelli
Gol: 2' Budimir, 21' Farias, 46' Martella, 74' Ricci
Espulsos: 53' Balzano 77' Krajnc
