Non b'at fèrias pro sa Sèrie B, su campionadu s'at a firmare dae su 27 in susu. Ocannu, a cajone de sos protzessos e de sas sentèntzias de su mese de Austu, sos giogadores ant a renuntziare a carchi die in prus de pasu. Oe Salernitana e Casteddu si giogant su postìtzipu chi at a tancare sa de 20 giorronadas. Tres puntos lis bisòngiant a ambas sas iscuadras, sos ruju-biaitos cherent torrare a sa prima positzione e sos granados nche cherent essire dae sa zona perigulosa de sa classìfica.
Movent bene sos meres de domo chi assàchiant sa porta de Storari. Pro tres bortas Coda at sa possibilidade de nche marcare su vantàgiu, ma su portieri casteddaju intervenet bene in totu sas ocasiones. Sos òmines de Torrente pressant in totu su campu e su Casteddu non resesset a nche barigare sa lìnia de tzentrucampu. Belle gasi a su de 18 minutos si bidet carchi cosa fintzas de marca ruju-biaita. Munari iscùtinat sos suos, cun sa conca proat a nch'inferchire unu corfu, ma Terracciano faghet una grandu parada. Su vantàgiu de sos òspites però no istentat a arribare. Est su de 28 minutos cando Barella nche ponet una botza medida a su tzentìmetru in sos pees de Giannetti chi, a sa lestra, nche l'istichit a intro de porta.
Sos sardos oramai nch'ant bogadu sa conca a foras e sighint a prodùere giogu. Su pee mànchinu de Di Gennaro lassat mòvere unu bellu tiru dae su lìmite de s'àrea chi però nch'iscudet a sa traessa, neghende·li su gol.
In su segundu tempus sa Salernitana torrat a leare agigu de coràgiu, ma sos giogadores de su Casteddu sunt collocados bene in su terrinu de giogu. Cunforma a su primu tempus su ritmu est menguadu e su giogu, semper firmu pro fallos o sostitutziones no agiuat s'ispetàculu. A su de 40 minutos sos sardos torrant a sinnare. Custa borta est tocadu a Tello, intradu in càmbiu de Fossati, a nche marcare su de duos. Su giogadore colombianu a pustis de nch'àere marcadu su gol, est andadu a dantzare in dae in antis de sos tifosos locales. Faina chi at fatu arrennegare sos campanos. Dae in cue est nàschida sa briga intre ambas sas formatziones, est intervènnida fintzas sa giustìtzia pro apasigare sos giogadores. In s'ìnteri s'àrbitru nch'at bogadu a foras a Tello, a Rossi e a Sciaudone. Targhita ruja. A pustis de unu recùperu de 6 minutos est acabbada.
Sos ruju-biaitos podent festare ca torrant a cumandare sa classìfica. Sa Salernitana prus pagu, ma in su primu tempus at ammustradu su balore suo. Làstima pro su chi est acontèssidu in sos ùrtimos minutos ca non faghet onore a nemos.
Formatziones
Salernitana: Terracciano, Empereur, Trevisan (51' Donnarumma), Lanzaro, Rossi, Odjer, Pestrin, Moro (63' Sciaudone), Colombo, Gabionetta (73' Eusepi), Coda.
Allenadore: Vincenzo Torrente
Casteddu: Storari, Barreca, Ceppitelli, Salamon, Balzano, Fossati (66' Tello), Di Gennaro, Munari, Barella (76' Krajnc), Giannetti, Sau (72' Cerri).
Allenadore: Màssimo Rastelli
Gol: 28' Giannetti 84' Tello
Espulsos: 86' Tello, 86' Rossi, 88' Sciaudone, 88' Melchiorri
