Rastelli cheret festare sos 47 annos comente si tocat e su donu prus mannu diat èssere unu bellu resurtadu. Sos sardos, binchende sa de oe, ant a èssere campiones de ierru. Sa Pro Vercelli est un’iscuadra organizada, mancari non siat candidada a nche pigare a Sèrie A. Sos sardos però ant su bantàgiu de su campu a s’ala issoro.
Movent bene sos ruju-biaitos. Si faghent bìdere deretu in sos tretos de Pigliacelli, ma sa defensa piemontesa resesset semper a nch’isboligare su murùtulu. A su de 14 minutos però su Casteddu nche colat. Farias batit unu tiru dae su cugione e Joao Pedro cun sa conca che l’incorrat a intro. Sighint a atacare sos sardos e, a pustis de deghe minutos, nche marcant fintzas su de duos. Custa borta su mèritu est fintzas de sa bona sorte chi tzocheddat a sa gianna casteddaja. Farias, fuende conca a sa porta, tirat dae su lìmite de s’àrea. Sa botza nch’iscudet a Munari chi, sena lu chèrrere nche marcat su segundu gol. 2-0. Sa defensa de Rastelli est posta bene in dae in antis de su portieri, sos giogadores intervenint sena problemas in cada botza lis càpitet a tretu. Sa Pro Vercelli proat a si nch’istèrrere, ma non resesset a nche cumprire nudda de bonu. In sos ùrtimos minutos de su primu tempus Sau podet fàghere sa de tres, ma su portieri cun unu miràculu si sarvat.
In su segundu tempus sos protagonistas sunt semper sos sardos, mancari pungant prus pagu. Sos biancos de Foscarini imbetzes paret chi nche siant giai in fèrias. Sa partida a bellu a bellu si nche faghet lena, a bortas paret firma. Petzi in sos ùrtimos minutos arribat su de tres. Pariat chi nemos tenneret prus nudda de nàrrere cando Farias nch’intrat a intro de s’àrea e l’arrumbat sa botza a Fossati. Su tzentrucampista de Monza tirat a filu de terra e sinnat su de tres. Su portieri non si tzìrigat nemmancu. A pustis de una paja de minutos s’àrbitru Candussio nche frùschiat s’acabbu.
Resurtadu bonu e iscuadra determinada, Rastelli podet festare. Su Casteddu est campione de ierru cun 46 puntos.
Formatziones
Casteddu: Storari, Murru (83’ Barreca), Ceppitelli, Salamon, Pisacane, Fossati, Di Gennaro (63’ Deiola), Munari, Joao Pedro, Sau (91’ Giannetti), Farias.
Allenadore: Massimo Rastelli
Pro Vercelli: Pigliacelli, Germano, Bani, Coly, Filippini, Ardizzone (49’ Beretta), Scavone, Mustacchio (30’ Sprocati), Rossi (85’ Emmanuello), Di Roberto, Marchi.
Allenadore: Claudio Foscarini
Gol: 14’ Joao Pedro, 25’ Farias, 92’ Fossati
