de Lisandru Beccu
 |
| Deretos Kevin Dooley. Url imàgine |
“No essedas dae domo”.
Est custu s'avisu chi sas autoridades tzinesas ant comunicadu a sos
tzitadinos de Pechinu. A ora de mesudie, eris, sa cantidade de matèria
particulada (PM 2,5) in s'àera nche fiat a cuota 391 25 µg pro metru
cubu. Pro s'Organizatzione mundiale de sa sanidade su livellu màssimu
chi s'òmine potzat suportare est de 25 25 µg pro metru cubu.
Mancu
sas previsiones meteorològica sunt de agiudu, custa situatzione at a
abarrare nessi finas a martis, cando forsis si nch'at a pesare su bentu.
S'incuinamentu de custas dies est aumentadu cando sas temperaduras ant
menguadu e sas pessones ant cumintzadu a allùghere sos impiantos de
iscardamentu. Però su problema no est s'impiantu in sesi, ma su fatu chi
sa majoria de sas caldàias, siant alimentadas a carbone. A custu tocat
de nch'agiùnghere su grandu tràficu e sas emissiones industriales e acò
sa fòrmula pro avelenare s'àera. In s'ìnteri su Ministeru nch'at imbiadu
sos controllos a totue pro averguare chi non b'apat emissiones
illegales.
A su chi narant sos espertos, sas possibilidades de
megiorare a sa lestra sa situatzione sunt iscarsas, finas a cando sa
resursa primàrgia de combustione at a èssere su carbone. Su guvernu
tzinesu s'annu coladu aiat naradu chi su 2030 diat dèvere èssere s'annu
cun sas emissiones prus artas in assolutu, posca, annu cun annu sa curva
nch'at a calare.
In sas dies imbenientes in Parigi b'at a èssere
sa cunferèntzia subra de su clima e chissai chi in cue su presidente de
sa Repùblica tzinesa, Xi Jinping, no apat pranos diferentes dae cussos
chi aiat disinnadu ocannu coladu.
