 |
| Deretos lìberos. Url imàgine |
Su guvernu italianu at postu in sa mesa 30 milliones de èuros pro sa
continuidade territoriale aèrea dae e pro sa Sardigna. Dinare postu a
disponimentu dae su Consìgiu de sos Ministros e chi, in sos ùrtimos
annos, nch'essiat semper dae sas càscias de sa Regione. Custa borta est
s'istadu – e pro gente meda est giustu chi siat gasi – a garantire su
deretu de sos sardos a biagiare cun sas matessi tarifas de sos àteros
tzitadinos italianos.
Su presidente Frantziscu Pìgliaru at naradu chi - “Semus
satisfatos de àere retzidu custas resursas. Afòrtigant s'oferta de
trasportu e nos ant a permìtere de megiorare sa continuidade
territoriale sarda. Amus a megiorare su modellu atuale e nch'amus a
barigare sas crititzidades aumentende sas possibilidades de biagiare dae
e conca a sa penìsula impreende sos tres aeroportos nostros. Unu passu a
dae in antis pro nche prenare s'isvantàgiu de s'insularidade”.
No est de su matessi pàrrere Ugu Cappellacci chi, dae su profilu suo de Facebook, at naradu chi - “Est
cosa bona chi b'arribet 30 milliones dae su guvernu, ma est a èssere
macos a los cunsiderare pagu prus de un'acontu cunforma a su chi nos
devent e a su chi nos nch'ant leadu in custu annu e mesu. Primu, ca cun
una manu Renzi si nch'at leadu 300 milliones, e segundu, ca sa
continuidade aèrea costat prus de su dòpiu e, a cajone de un'acordu in
su 2006 intre Prodi, Soru e Pìgliaru, la pagat sa regione, cando in
antis la pagaiat s'istadu.”
