Su Pescara non marcaiat gol contra a su Casteddu dae su 1987,
ma custa borta sos tres puntos si nche los ant postos in butzaca sos
giogadores de Màssimo Oddo. Sos biancu-asulos difatis giogant mègius sa
partida e amministrant bene pro totu sos 90 minutos. Su Casteddu non si
faghet bìdere belle mai in sos tretos de Fiorillo, tirat in porta pagu e
nudda e in prus su giogu suo est cunditzionadu dae s'espulsione
discutìbile de Di Gennaro.
In sos primos minutos de giogu sunt sos
meres de domo a gestire in manera ordinada sa botza. Andrea Cocco proat
a nche giùghere in vantàgiu sos suos, ma Storari li nche serrat totu
sos cugiones, sarvende su resurtadu. Est su tzentrucampu su giassu prus
catzigadu dae sos atletas, difatis ambas sas iscuadras non resessent a
agatare tretu pro nche cròmpere a su tiru. Sa partida est alluta e in
campu b'at giai nervosismu, difatis, cando semus a su de 20 minutos,
s'àrbitru at giai ammonidu tres giogadores. A su de 37 minutos imbetzes
acontesset carchi cosa chi at a cunditzionare meda su restu de sa
partida. Di Gennaro recùperat una botza pèrdida dae sos cumpàngios, ma a
pàrrere de su diretore de giogu su giogadore at cummìtidu unu fallu
(chi a cantu paret non b'est). Tocat e li bèntulat sa targhita groga. Su
tzentrucampista si nch'arrennegat neghende s'infratzione e Maresca de
Nàpoli no istat cue cue e nche l'ammustrat fintzas sa targhita ruja. A
foras.
Dae inoghe a in antis su Casteddu s'agatat in dificultade e chircat mescamente de si defensare.
In
su segundu tempus sos ritmos non mudant, ma a su de 52 minutos arribat
su gol de Lapadula cun unu tiru a filu de terra dae intro de s'àrea. Est
como chi su Casteddu leat coràgiu, ma non resurtat mai a èssere
cuncretu in sas manovras de atacu. Su Pescara imbetzes arriscat de
torrare a marcare cun unu grandu tiru de Caprari, ma Storari cun unu
miràculu tocat sa botza su tantu giustu pro nche la bogare a foras.
Intrant fintzas Balzano, Sau e Farias a morigare sa bagna, ma non b'at
remèdiu, sa majoria de sos giogadores sunt istracos.
Acabbat gasi
su cunfrontu intre sas sas duas iscuadras, prima partida pèrdida in
campionadu dae sos sardos. In su malu però su primu postu est abarradu
in possessu de su Casteddu, firmu a 13 puntos, in unu campionadu, cussu
de Serie B, chi si cunfirmat tramposu e imprevidìbile. Domìniga chi
benit imbetzes arribat a Sardigna su Cesena, àtera iscuadra favorida pro
sa promotzione, chi oe etotu at bìnchidu contra a su Livorno. B'at a
chèrrere atentzione manna.
Formatziones
Pescara:
Fiorillo, Crescenzi, Zùparic, Fornasier, Zampano, Verre, Mandràgora,
Torrèira (73' Selasi), Valoti (53' Caprari), Cocco (65' Campagnaro),
Lapadula.
Allenadore: Màssimo Oddo
Casteddu:
Storari, Pisacane, Capuano, Krajnc, Balzano, Deiola (58' Fossati), Di
Gennaro, Dessena, Joao Pedro, Cerri (62' Farias), Melchiorri (79' Sau).
Allenadore: Màssimo Rastelli
Gol: 52' Lapadula
Espulsos: 37' Di Gennaro
