 |
| deretos Vuelta situ ufitziale. |
Sa de 20 tapas de sa Vuelta a España 2015 est sa chi nos at a dare su nùmene de su binchidore. A dae chi sa de cras in Madrid at a èssere pagu prus chi no una passigiada, un'isfilada de sas iscuadras in costùmene a trassa de festa de su Redentore. Sa de oe est una tapa particulare chi sos organizadores ant lassadu a ùrtima comente chi ischirent chi diat èssere istada determinante. Una tapa curiosa a beru si pensamus chi sos curridores àrtziant e falant semper dae sos matessi bator montes in antis de si leare su caminu conca a s'arrivu.
Sunt bator montes unu in fatu de s'àteru: Puerto de Navacerrada (grandu prèmiu de prima categoria 9,4 km a su 6,6% de pendèntzia mèdia cun una punta màssima de su 11,25%); Puerto de la Morcuera (1ª cat., 11,5 km a su 5,4%, 8,5% max); torra Puerto de la Morcuera ma dae sa banda oposta (1ª cat., 10,4 km al 6,6%, 9,5% max) e Puerto de Cotos
(1ª cat., 11,0 km al 5,3%, 8,5% max) finas custu giai afrontadu in
pessu a pustis de sa partèntzia e chi sìngiat sos 20 chilòmetros dae su
traguardu finale.
In pessu mòvidos, a pustis de su àrtzia e fala in unu
pranu farsu infadosu chi nche torrat sos atletas a su cùcuru de Puerto
de Navacerrada, s'ant a agatare cara a unu puntu in giosso chi li diat
pònnere su fritu finas a un'astore! Puntu in giosso chi aiant afrontadu a
s'imbesse unos cantos minutos in antis. E dae cue cùrrere, mòlere,
achicare finas a Cercedilla! Tzircùitu imboligosu e malu a cumprèndere
chi at a marcare a fogu cossas e ghenugros de sos tziclistas. E singiale
mannu at a lassare finas in s'ammentu de sos apassionados chi no ant a
chinnire ogru dae su campione sardu e dae s'olandesu. Si movet a ora de
sa una e, francu imprevistos, si diat dèvere arribare a ora de sas ses.
Su tempus previdit unu chelu agigu imbeladu cun un'umididade relativa a
curtzu a su 37% e forsis cun carchi gùtiu de abba. Bentu lèbiu at a
lusingare sa carenas de atletas e amantiosos e sa temperadura de
deghe/dòighi grados at a fàghere sa diferèntzia cun sas tapas a
solianu.
Chie sunt sos favoridos? Non sunt pregontas de fàghere
ca sa risposta diat pòdere èssere un'iscavanada pro cada tifosu. Nois
isetamus sa levra nostra, isetamus chi sas biellas suas istrìgiles e
nervosas nche bàrighent su traguardu a dae in antis de Dumoulin. Su
restu at a èssere s'istòria a nos lu contare. A tempus prus.
