A pustis de sos tres puntos
balangiados contra a s'Avellino, sos giogadores de Rastelli cherent
sighire a cùrrere in fatu a su Livorno. Sos toscanos finas a como ant
bìnchidu totu sas partidas e sunt a su primu postu in classìfica, a duos
puntos dae sos sardos. S'Entella imbetzes at pèrdidu sas ùrtimas duas
partidas e cheret torrare a bìnchere in dae in antis a su pùblicu de
domo. Rastelli detzidet de fàghere agigu de rotatziones, presentende in
campu dae su primu minutu a Cerri, a Munari e a Krajnc.
Sa partida
de sos ruju-biaitos est giai in pigada dae su primu minutu. Unu
passàgiu traessu in mesu de s'àrea, a pustis de nch'àere iscutu a su
coddu de Sestu, nche crompet a sos pees de Ferrèira chi no istat “dui
dui” e ischìtzinat a totu coddu a suta de sa traessa, marchende su
vantàgiu. Su Casteddu non si cuat e faghet mòvere bene sa botza,
fraighende unu giogu netu. Andat a curtzu a su parègiu cun Joao Pedro a
su de 10 minutos, ma sa botza nch'essit a foras. S'unu a unu arribat a
su de 32 minutos cun unu tiru de penalidade de Giannetti. Dessena,
intrat in àrea cun sa botza, si nche l'illònghiat e Belli li ponet su
pee bortulende·lu. S'àrbitru no at dudas e cuntzedet sa penalidade chi
s'atacante toscanu trasformat in gol. Sas iscuadras intrant a si pasare
cun su resurtadu in echilìbriu perfetu. In su segundu tempus, a su de 56
minutos, Staiti proat a tirare in su primu palu dae su lìmite de
s'àrea, ma sa mira est isballiada. Bi proat fintzas Cerri cun unu corfu
de conca a su de 61 minutos, ma s'incorrada est dèbile. Cerri non
s'ispantat e sighit a atacare, ma, a su de 66 minutos, Volpe lu
cuntrastat e lu faghet rùere in intro de s'àrea. Rigore! Su giogadore
campanu, giai ammonidu, retzit sa segunda targhita groga dae s'àrbitru e
devet lassare su terrinu de giogu. Su tiru de penalidade custa borta lu
trasformat Farias, chi fiat intradu dae oto minutos a su postu de
Munari. Sa partida oramai est in calada, ma tocat de abarrare a ogros
isparpeddados, sa partida cun sa Ternana no est petzi un'ammentu. Pro su
restu de sa partida su Casteddu amministrat bene e in su primu minutu
de recùperu torrat a marcare unu gol. Custa borta Melchiorri, intradu a
su postu de Cerri, ponet in mesu de s'àrea unu passàgiu traessu, Farias
lu firmat e cun su pee destru inferchit a Iacobucci marchende su 3-1
definitivu.
S'iscuadra est creschende e si bidet, ma pro fàghere
pronòsticos est galu chitzo, in s'ìnteri sàbadu a su Sant'Elia at a
arribare su Latina.
Formatziones
Virtus
Entella: Iacobucci, Zanon, Belli (81' Iacopini), Pellizzer, Ceccarelli,
Fazzi, Staiti, Volpe, Sestu (64' Caputo), Ferrèira (71' Troiano),
Pètkovic.
Allenadore: Alfredo Aglietti
Casteddu:
Storari, Murru, Capuano, Krajnc, Pisacane, Munari (54' Farias), Fossati,
Dessena, Joao Pedro (89' Deiola), Cerri (79' Melchiorri), Giannetti.
Allenadore: Màssimo Rastelli
Gol: 1' Ferrèira, 32' Giannetti (P), 62' Farias (P), 91' Farias
Espulsos: 66' Volpe
