 |
| dae sardiniapost.it |
Arga peri sos sartos de Sardigna ddoe nd'at a muntones. Ma a dolu mannu
non ddoe at sceti refudos sòlidos urbanos. S'inchesta de Sardinia Post
de oe, conduida dae Pàulu Stella in tretos de Macumere (in s'àrea de su
polìgonu de s'Ena ruggia, serente a su giassu archeològicu de Tamuli),
nos mustrat chi non nos faghimus mancare nudda, nemmancu refudos militares.
«Intre is matzas» ddoe at «chèntinas de bombas a manu esplòdidas e male cuadas in unu fossu».
In cue nât chi ddoe at bombas Srmc mod. 35 e àteras chi parent granadas
Od 82/Se tentas dae s'Esèrtzitu italianu. E chi, paris cun unos cantos
filos metàllicos (a sa segura is chi s'agatant in intro de is Srmc),
sunt isparghinadas a inghìriu de su fossu pro nessi 100 metros.
Narat
Stella chi su polìgonu mentovadu «no est istàbile che a su de Chirra»: «sunt
is ordinàntzias de su cumandu de sa Brigata Sassari, publicadas in
s'albo pretòriu de sa Comuna de Macumere, a dispònnere 4-5 bias a s'annu
s'evacuatzione de s'àrea de sa presèntzia de pessones e animales dae is
8 a is 23 pro totus is dies netzessàrias a s'esertzitatzione». Dae s'ùrtima nât chi nch'at coladu carchi mese. Tando? Cuadòrgiu o ismèntigu?
