de Màuru Piredda
Cales sunt is novidades de is eletziones
autonòmicas catalanas de eris? Sa prima est s'afluèntzia: at leadu parte
a custa torrada su 77% de is chi aiant su deretu, prus de su 7%
cunforma a su 2012. Sa segunda est chi sa coalitzione Junts pel sí (chi
auniat Convergència Democràtica de Catalunya, su partidu de su
presidente Artur Mas, e is sotzial-democràticos indipendentistas de
Esquerra Republicana de Catalunya) at regortu 1.620.973 votos: est a
nàrrere su 39,54% e 62 sègios. Custu resurtadu tocat de ddu cunfrontare
cun is datos de su 2012, cando Convergència i Unió (cun 1.112.341 votos,
su 30,7%) e Erc (496.292, su 13,7%) oteniant 71 sègios. Tando? Ddoe at
àpidu una mèngua de is votos indipendentistas?
Nono: ca, comente amus
naradu, custu giru ddoe at àpidu prus votantes; ca in su 2012 in Ciu bi
fiant fintzas is democristianos de Unió Democràtica de Catalunya, chi si
nche sunt istesiados a pustis chi Mas at faeddadu semper de prus de
indipendèntzia (e chi imoe nch'ant pigadu sceti 102.870 preferèntzias);
ca est crèschida sa manca indipendentista de sa Candidatura d'Unitat
Popular (dae 126.219 a 336.375 votos e dae 3 a 10 sègios); ca sa
coalitzione Catalunya Sí que es Pot (mancari andende male cunforma a su
potentziale de Podem/os, a is resurtados de is eletziones locales de su
beranu "colau" e a is 13 sègios regortos in su 2012 petzi dae Esquerra
Unida i Alternativa/Verds), mantenet una lìnia a favore de su deretu de
is catalanos a s'autodeterminatzione.
Ma tando? Ite est su chi non
torrat? Non torrat su resurtadu, ca impedit de mòvere conca a sa
decraratzione unilaterale de indipendèntzia. A su chi narat Antonio
Baños de sa Cup, is indipendentistas, firmende·si a su 47,8%, «no ant
bìnchidu su plebiscitu». De prus: sa Cup, anticapitalista, at naradu chi
nono a sa possibilidade de pònnere a disponimentu is votos suos pro
elègere a Mas comente presidente («Sa lìnia ruja nostra est chi no amus a
reconnòschere e no amus a traballare cun chie mènguat is resursas e cun
is currotos»). Paret duncas pòssibile una cunvergèntzia intre Cup e
Cat-sí. Pro parte sua su cabu-lista de custos, Lluís Rabell, at naradu
chi «no amus a sustènnere perunu guvernu o proposta de guvernu chi
tèngiat unu programma sotziale contràriu a su chi defensamus e chi
(indiritzende·si a is ispagnolistas de Ciutadans, Ndr) non reconnoscat
sa natzione catalana e is deretos suos».
