de Lisandru Beccu
Rastelli binchet in su
Sant'Elia contra a sa ex iscuadra sua. Sos “sardos” giogant bene pro
totu sa partida, tzedende petzi a s'ùrtimu, cando s'istrachidùdine si
faghet intèndere de prus. Su Casteddu rinùntziat a Deiola, friscu friscu
de rinnovu cuntratuale e lassat logu a Joao Pedro. Pro su restu sa
formatzione est sa matessi de sa chida colada, francu Pisacane chi
giogat a su postu de Murru.
S'Avellino gestit bene sa botza a su
cumintzu, faghende·si bìdere in dae in antis cun Insigne in su ladus de
manca, ma sa defensa ruju-biaita est pronta e respìnghere sos atacos
angenos. A su de 21 minutos Melchiorri paret chi apat sa possibilidade
de dare pensamentos a Frattali, ma su defensore recùperat e nche bogat
sa botza addae de sa lìnia de fundu. Su Casteddu creschet e proat a nche
colare in vantàgiu cun unu tiru de Farias chi però nch'essit a foras.
Tando tentat Melchiorri, ma at prus pagu sorte. Nche colant pagos
minutos e Farias s'imbentat unu passàgiu filtrante chi nche colat sas
ancas de sos defensores e nche crompet a sos pees de Sau (forsis in
foras de giogu) chi si fùrriat e la tocat su tantu suo pro marcare su
gol. Casteddu in vantàgiu. Mokulu tando chircat de nche tragiare sos
suos, intrat in àrea dae su ladus de manca, ma su tiru nch'essit a
costàgiu de su palu defensadu dae Storari.
In su segundu tempus,
semper Mokulu at sa possibilidade de nche giùghere a su parègiu sos
biancu-birdes, ma a sa sola, cara a Storari si faghet ipnotizare. Mancu
su tempus de chinnire ogru e Melchiorri raddòpiat a su de 53 minutos.
Nche collit cun sa conca unu tiru dae su cugione de Farias e
l'indiritzat a manca de Frattali marchende su 2-0. Oramai su Casteddu si
nch'est fatu mere de su campu e proat, sena fortuna, a ismanniare su
nùmeru de sos gol cun Farias e Di Gennaro; unu tiru de Sau a su de 19
minutos nch'iscudet a su palu e torrat in segus. Mokulu, su mègius de
s'Avellino finas a como, at sa possibilidade de fàghere torrare sos suos
in partida, ma su portieri ruju-biaitu li negat sa glòria, no est die.
Su Casteddu rallentat e sos òmines de Tesser torrant a intrare in
partida a su de 84 minutos. Zito dae su ladus de dereta nche ponet sa
botza a mesu de s'àrea, in ue Arini antìtzipat a totu cantos e fùlminat a
Storari cun unu destru de prima intentzione. Su recùperu de chimbe
minutos non permitit a sos campanos de nch'agantzare su parègiu. Sa
partida acabbat 2-1 pro sos sardos, ma non b'at mancu tempus de festare
ca martis si giogat in Chiàvari cun sa Virtus Entella.
Formatziones
Casteddu:
Storari, Balzano, Capuano, Salamon, Pisacane (59' Murru), Joao Pedro,
Di Gennaro (82' Fossati), Dessena, Farias (69' Deiola), Sau, Melchiorri.
Allenadore: Màssimo Rastelli
Avellino:
Frattali, Bastien (55' Jidayi), Visconti, Ligi, Biraschi, Insigne (62'
Soumare), Gavazzi (28' Zito), Arini, Trotta, Nica, Mokulu.
Allenadore: Attìlio Tesser
Gol: 29' Sau, 53' Melchiorri, 84' Arini
