de Màuru Piredda
Pagas dies a como su Parlamentu grecu at aprovadu su de tres pianos de agiudos propostu dae is gasi narados “creditores internatzionales”. Sa natzione ellènica at a retzire 86 milliardos in càmbiu de unas cantas «mesuras difìtziles» (pro impreare is paràulas de su ministru de is Finàntzias Euclid Tsakalotos). Ddoe at a àere unu «pranu de privatizatziones afortiadu», at naradu su presidente de s'Eurogrupu, s'olandesu Jeroen Dijsselbloem.
 |
| Wikipedia |
Pagas dies a como su Parlamentu grecu at aprovadu su de tres pianos de agiudos propostu dae is gasi narados “creditores internatzionales”. Sa natzione ellènica at a retzire 86 milliardos in càmbiu de unas cantas «mesuras difìtziles» (pro impreare is paràulas de su ministru de is Finàntzias Euclid Tsakalotos). Ddoe at a àere unu «pranu de privatizatziones afortiadu», at naradu su presidente de s'Eurogrupu, s'olandesu Jeroen Dijsselbloem.
Subra de 300 sègios is votos a favore a su “memorandum” sunt istados 222. In prus de sa majoria de Syriza (partidu chi contat 149 parlamentares) ant votadu chi emmo is partidos de opositzione (Nd, Pasok e To Potami). 64 is contràrios: intre custos is nazistas de Arbèschida dorada e, cun positziones diferentes, is comunistas de su Kke e sa manca interna de su partidu de Alexis Tsipras.
Sighit, tando, a èssere semper prus fungudu su surcu intre is duas ànimas de su partidu de manca chi, a comintzu de su 2015, at bìnchidu is eletziones a pustis de àere propostu a is grecos unu programa de riformas radicales. Intre is reberdes agatamus a Zoe Konstantopoulou, presidente de su parlamentu, e a s'ex ministru de s'Energia Panayiotis Lafazanis, cabu de sa “Prataforma de manca”. Galu non s'ischit cale at a èssere sa positzione de su predetzessore de Tsakalotos, Yanis Varoufakis.
Chi ddoe apat sa possibilidade de fàghere unu partidu nou chi movat dae s'Oxi (nono) espressadu in su referendum de su 5 triulas est totu de bìdere.
In s'ìnteri Lafazanis e cumpàngios sunt cramende is giòvanos e is traballadores grecos a«cumbatas unitàrias pro nche bortulare totus is memorandum e impònnere un'orientamentu progressista nou a su paisu». Su guvernu de manca, a dae chi in s'atzione sua est sustènnida dae partidos aversàrios, est perdende, duncas, sa fisionomia sua. Su 20 de austu Tsipras at a pedire sa fidùtzia, si dd'at a mancare sa de sa manca interna is eletziones antitzipadas ant a èssere inevitàbiles. E peri sa partzidura de Syriza.
