de Maurìtziu Sale
Tel Aviv. Sunt a su nessi bator sos mìssiles chi nche sunt rutos oe in su nord de Israele a làcana cun su Lìbanu. Sa noa est de s'esèrtzitu israelianu. A totu sos chi istant in sa zona interessada lis ant dadu s'òrdine de non si mòvere dae domo.
Sos bator mìssiles sunt mòvidos dae sa Sìria, cunforma a su chi at decraradu su responsàbile militare de s'imprenta. Duos nche sunt rutos subra sos montes de su Golan e sos àteros in sa Galilea Arta. Sa zona dae ue sunt mòvidos est Quneitra, un'àrea controllada dae s'esèrtzitu de Assad e in ue, a su chi nânt sos mèdios de informatzione, sunt ativos sos Hezbollah. Peruna noa galu, pro su chi pertocat fertos o mortos.
