Deghe annos nch'at coladu. Su 13 e su 14 de abrile de su 2008, su bonu de sos italianos torreit a votare a Berlusconi a pustis de duos annos de guvernu Prodi. Ma sa cosa curiosa est un'àtera. Pagu in antis chi s'acareret sa crisi finantziària globale famada, a sa manca italiana nche la giagareint che cane dae crèsia. Dae guvernativa devenneit extra-parlamentare a mala gana. Sa manca "Arcobaleno" che a su Psiup, "partito scioltosi in un pomeriggio".
Ma comente nascheit cussa aventura/disaura? Lòmpida sa netzessidade de si partzire dae su Pd in pessu nàschidu, sos comunistas de Bertinotti e Diliberto, sos birdes de Pecoraro Scanio e sa Manca democràtica de Mussi si gheteint a pare presentende a sos eletores s'unidade chi, in medas, fiant disigende a pustis de sa crisi istòrica post-Bolognina. Avesados a su 2+2=4, mancari in polìtica siat s'àlgebra a dominare, sos dirigentes de cussos partidos bisaiant pertzentuales mannas. In s'ìnteri b'aiat chie fiat comintzende a chèrrere su partidu ùnicu, sa tabula rasa de sas organizatziones originàrias.
Pietro Folena, delfinu de Alessandro Natta in su Pci òrfanu de Berlinguer, aiat finamentas aviadu su tesseramentu a su "partito che ancora non c'è". Ma perunu de issos s'imaginaiat unu 3% o barda. Dae tando s'abolotu. E su dilemma. Rifondazione, su partidu prus mannu, apronteit su cungressu cun Vendola contra a Ferrero. Su primu cheriat s'annu zeru e su partidu ùnicu de sa manca; su segundu, a pustis de pagu tempus nche crompeit a sa Federatzione de sa sinistra cun Diliberto e Salvi, est a nàrrere "unidos ma cada unu cun s'organizatzione sua".
Deghe annos a pustis sa matessi cosa est acontèssida a su carrabusu: unidade istòrica intre oto siglas (mancari sena àteras formatziones chi aiant dadu vida a sa Mesa natzionale) presentada a sos eletores e pertzentuales de su 20%, nât chi, prus chi non possìbiles. A pustis de su 2% o barda su dilemma e s'abolotu chi at ingendradu sas dimissiones de Anthony Muroni. Comente a nàrrere chi sa manca italiana aiat antitzipadu totu deghe annos a como. S'ùnica diferèntzia est sa de su guvernu: a s'arcu de chelu lu castigheint a pustis de àere guvernadu s'Itàlia; su carrabusu est galu a la guvernare sa Sardigna e dae inoghe a sas regionales tempus bi nd'at. Ma pro como su deja-vu nch'at coladu sa rivolutzione chieta.
