Sa “Plataforma per la llengua”, Organizatzione non guvernativa chi traballat pro s’amparu e sa promotzione de sa limba catalana in totu sos territòrios in ue si faeddat, cun sa collaboratzione de BarnaSants e cun s’agiudu de sa Generalitat de Catalunya, nch’at ammaniadu s’initziativa “Mans manetes. L’Alguer: paraules, cançons i veus de minyons de l’Alguer” chi est nàschida cun sa punna de ofèrrere a sas generatziones noas de S’Alighera, chi non podent istudiare su catalanu in iscola, un’aina culturale de giudu fintzas pro sos insinnantes chi diant chèrrere promòvere custa atividade peri sas iscolas, dae sa primària a sas superiores.
Su progetu, chi naschet comente libru-discu, est una regorta de bìndighi cantzones in aligheresu, chi sunt òperas de Pino Piras, Pasqual Gallo, Antonello Collendanchise, Franco Cano e Mariano Piras e sete de sa traditzione infantile catalana de aterue.
In su libru, pro cada cantzone agatamus un’introduida a su testu cun riferimentos istòricos e sotziales, informatziones subra de sos autores e de sos arrangiadores, referèntzias discogràficas e sos acordos pro sonare sas cantzones a chiterra.
Sas cantzones las ant cantadas sos pitzinnos de S’Alighera chi in custos annos ant imparadu a cantare in aligheresu in iscola ma ant cantadu fintzas artistas catalanos de aterue, cun sa punna de cumpartzire su patrimòniu musicale de S’Alighera cun unu pùblicu prus mannu, aberende una ventana pro chi sos alighereos potzant intendere àteras pronùntzias de su catalanu e pro lis ammentare chi custa limba la faeddant prus de deghe miliones de persones in bator istados de Europa.
Cun custa faina sos catalanos e sos aligheresos nos ant mustradu chi, mancari bivende cadaunu in tretos suos, si potzat traballare paris pro pròmovere s’ufitzialidade de sa limba in logu de iscola, ca sos pitzinnos de oe sunt su venidore de sas limbas de minoria.
