Fintzas ocannu, baranta comunas de Otzitània e de Catalugna nch'ant ammaniadu sa "Dictada Occitana", unu cuncursu de ortografia in otzitanu abertu a totus.
Sa dinàmica est simpre meda: si leghet unu testu in otzitanu e sos concurrentes lu depent iscrìere. A pustis lu curregent e binchet su chi faghet prus pagu faddinas. Ocannu su cuncursu l'ant fatu su 27 de ghennàrgiu e ant seberadu unu testu de dughentas paràulas leadu dae unu libru de Pèire Beziat.
Sa "Dictada" est nàschida su 1998 in su Tzentru Otzitanu de sa bidda de Castrés, si tenet s'ùrtimu sàbadu de ghennàrgiu e cada annu bi leat parte semper prus gente. Sa punna de custu cuncursu est sa de promòvere su patrimòniu linguìsticu de sa limba d'Oc ca permitit de avalorare sa richesa de sa literadura otzitana e de dimustrare chi custa est una limba creativa meda.
Carchi die in antis de su detadu, unu comitadu de letura s'addòbiat e sèberat s'autore e su testu de lèghere. Sa die s'autore detat su testu seberadu e, in s'ìnteri chi su grupu de curretores est curregende sos elaborados, si tenet un'animatzione pro mustrare a sos cuncurrentes cantu podet èssere creativa sa limba otzitana. A pustis de sa curretzione e de s'ispetàculu b'est sa tzerimònia de premiatzione in ue cunsignant sos prèmios a sos iscolanos e a sos adultos.
S'addòbiu acabbat cun su "verre de l'amitiè", sa tatza de s'amistade. Sa Dictada Otzitana est una manera simpre, econòmica e galana chi permitit de avalorare sa limba e sa cultura otzitanas cun unu disafiu chi agradat a mannos e minores.
 |
| Locandina de s'eventu: incarca pro l'ismanniare |
