Chimbe sunt sos puntos chi su Partito dei sardi at publicadu pro pòdere valutare, intro de s’8 de ghennàrgiu, sas intesas polìticas conca a sas votatziones. Reconnoschimentu de sa presèntzia «indipendentista democràtica» in intro de cale si siat coalitzione; cunvergèntzias pro sas eletziones polìticas italianas; garantzias pro chi su Pds potzat espressare sa boghe sua in intro de su Parlamentu italianu; «obietivos cuncretos chi vìnculent sos eletos» in contu de insularidade, Europa, fiscalidade, bilinguismu, infrastuturas, traballu, servitudes militares; reconnoschimentu de sa legitimidade de su Pds a ghiare sa coalitzione pro sas eletziones sardas imbenientes.
Est craru chi custos puntos non sunt indiritzados
a su fronte autodeterminista ma a sos partidos italianos e mescamente
a su Pd. Si cunfirmat, gosi, sa voluntade de su partidu de
Maninchedda a promòvere un’Opa subra de su tzentru-manca nointamen
si chistionet de «cale si siat coalitzione». E nointamen oe apat
annantu (crìticu cun sos cronistas e sos polìticos chi
«personalizant totu cantu») chi sa «coalitzione de cunvergèntzia
natzionale a tratzione indipendentista» no est su tzentru-manca ma
carchi cosa prus manna «ca punnat a unire sas fortzas
indipendentistas, liberales e laburistas de Sardigna».
Pro parte issoro, sos dirigentes de su Pd non paret chi apant presse de lis torrare deretu risposta. «No est una chistione – gasi su segretàriu Cucca – chi podimus allegare como, non tocat petzi a su Pd a disinnare, est unu sèberu chi cheret cumpartzidu dae totu sos partidos de sa coalitzione chi s’ant a dèvere espressare in su momentu dèghidu».
