Un'istùdiu de s'Imperial College de Londra e de s'Universidade norvegesa de Sièntzia e tecnologia at ammustradu sas propiedades salutìsticas de sa nughe. Sas persones chi papant nessi 20 grammos de nughe cada die ant un'arriscu prus bassu de isvilupare maladias cardìacas e tumores.
Sunt bonas sas noas pro sos amantiosos de sa frùtora sica. Sa chirca, publicada in BMC Medicine, at bogadu a campu datos de importu mannu. In pràtica, a papare cada die unu pùngiu de nughe reduit de su 30% s'arriscu de maladias coronàricas, de su 15% s'arriscu de tumores e de su 22% su de morte primidia.
«Amus iscobertu – at naradu Dagfinn Annue de sa School of Public Health de s'Imperial College – una ridutzione de s'arriscu de paritzas maladias diferentes. Aspetu chi ponet in una relatzione forte su consumu de nughe e sos resurtados pro sa salude. Efetos mannos meda, cunsiderende chi s'alimentu est assuntu in cantidades pagu prus o mancu limitadas».
Su grupu de traballu at analizadu 819mìgia persones de totu su mundu. S'istùdiu at fintzas registradu unu minimòngiu de maladias ligadas a s'aparadu respiratòriu e a su diabete, ma cun datos prus pagu evidentes.
Sa chirca, in generale, at pertocadu su consumu de sa frùtora sica comente sa nutzola, sa mèndula, sa nughe e de sos legùmenes comente sa nutzoledda americana. Sos resurtados intre sas genias de frùtora sunt simigiantes.
