Est programada pro su 23 de santandria in Cabu Frasca sa manifestatzione contra a sas esertzitatziones militares. Su movimentu sardu contra a s'ocupatzione militare “A Foras”, dat apuntamentu a sas deghe de mangianu cara a sa rugrada intre su caminu provintziale 65 e su caminu provintziale 69.
B'at a mòvere fintzas paritzos postales dae sas tzitades de Terranoa, Aristanis, Casteddu, Nùgoro e Tàtari. In prus, in sas dies imbenientes, s'organizatzione at a giùghere a in antis un'òpera de sensibilizatzione programende unas cantas assembleas in totu sa Sardigna, dae Terraba a Nùgoro, colende·nche finas dae Casteddu, Macumere e Tàtari.
Sa protesta ponet in fatu a sas initziativas de sos ùrtimos meses contra a sa gherra e a sas isperimentatziones de sas armas in sos polìgonos sardos. «In su mese de santandria in su polìgonu de Cabu Frasca sos aèreos de su de ses istormos s'ant a addestrare fintzas cun is bombas Mk, produidas in Domusnoas dae sa fàbrica tedesca RWM, chi las bendet a s'Aràbia Saudita pro bombardare milliones de tziviles disamparados in su Yemen» narant sos ativistas in su comunicadu ufitziale.
Su 23 de santandria in programa b'at fintzas un'isciòperu in sas iscolas pro permìtere a sos istudiantes de leare parte a sa manifestatzione.
