A su Casteddu li bisòngiant sos puntos pro si sarvare cantu prima e sas iscuadras giustas pro los otènnere sunt sas aversàrias diretas chi tenent su matessi obietivu de abarrare in Sèrie A. Sa partida cun su Crotone at donadu àteros tres puntos a sos sardos permitende·lis de nche cròmpere a deghe in classìfica. A pustis de sete giorronadas rapresentant unu resurtadu discretu.
Sos òmines de Rastelli giogant cun una novidade. In sos cunvocados non b'est Joao Pedro, chi in s'allenamentu de eris s'at segadu sa fìbula. Sos casteddajos, mancari òrfanos de su giogadore brasilianu, ant agatadu deretu sos trastes pro iscassinare sa porta de Cordaz. A su de 25 minutos est Tachtsidis a chircare su gol cun unu tiru a bolu, ma su portieri Calabresu parat. Su vantàgiu de su Casteddu arribat a su de 38 minutos cun Di Gennaro. Su tzentrocampista, dae foras de s'àrea lassat mòvere unu bete de tiru chi nch'intrat in su cugione bassu a sa manca de Cordaz. Ocannu est su primu gol in Sèrie A pro su giogadore lombardu. Sos òmines de Nicola proant a nche la paregiare in antis de sa pàusa, ma Rafael est atentu.
A pustis de deghe minutos dae sa torrada a su campu, sos sardos raddòpiant. Borriello iscàrrigat a porta unu tiru ma Cordaz respinghet cun s'agiudu de sa traessa. Sa botza a ùrtimu nche crompet a sos pees de Padoin chi, dae su lìmite de s'àrea e cun unu tiru a filu de terra, resesset a nche barigare s'estremu defensore. Sa partida si podet nàrrere chi est in seguru ma sos ruju-biaitos sighint a atacare. Bi proant Murru e Di Gennaro, ma nudda. Fintzas su Crotone proat a ismesare s'isvantàgiu, ma Falcinelli, Dussenne e Martella, ma sos tiros non sunt pretzisos. In sos ùrtimos minutos su traballu de sos òmines de Nicola est premiadu. Dae unu tiru lìberu a prus de 35 metros de distàntzia dae sa porta Stoian nche marcat un'èuro-gol. Su tiru a fògia morta meravìgiat a Rafael chi, sende agigu a dae in antis, non resesset a torrare in segus pro defensare sos palos. 2-1. Su tempus pro àteras atziones est pagu e sas iscuadras, a sos tres frùschios, si nche torrant a s'ispogiadòrgiu.
Formatziones
Casteddu: Rafael, Pisacane, Ceppitelli, Bruno Alves, Murru, Padoin, Tachtsidis, Isla (86' Salamon), Di Gennaro (76' Munari), Sau (79' Giannetti), Borriello.
Allenadore: Massimo Rastelli
Crotone: Cordaz, Ceccherini, Claiton (27' Dussenne), Ferrari, Rosi (67' Simmy), Rohden, Crisetig, Martella, Tonev (74' Stoian), Falcinelli, Palladino.
Allenadore: Davide Nicola
Gol: 38' Di Gennaro, 56' Padoin, 91' Stoian
