In sas istatìsticas bogadas a campu dae Assoaeroporti (Assòtziu italianu gestores de aeroportos) dae su mese de ghennàrgiu a su mese de austu, s'aeroportu aligheresu resurtat unu de sos peus in Itàlia.
Sos movimentos de su 2016, in s'iscalu, cunforma a su matessi perìodu de su 2015 chi amus mentovadu in antis, ant registradu una flessione importante. Sos movimentos totales ant minimadu de su 16,3%, sos passigeris imbetzes de su 19,3%. Fintzas sos aèreos cargo ant menguadu de su 19,6%, cun 6,5 tonnelladas. Cunsiderende chi in su matessi intervallu de s'annu coladu sos passigeris in trànsitu in s'aeroportu de sa “riviera” fiant 1.190.067, ocannu su nùmeru est abarradu a 960.211. In pràtica 229.856 persones de mancu.
Sas fainas andant mègius in sos aeroportos de Su Masu e de Terranoa. In s'iscalu casteddaju registrat 2.529.476 passigeris in trànsitu, cun una flessione de su 0,8% cunforma a un'annu a como. Su de Terranoa imbetzes est crèschidu de su 13%, cun 1.899.482 persones.
Pro seguru sos datos sunt influentzados dae s'atividade de Ryanair. Dae su mese de santandria sa cumpangia irlandesa at a abbandonare de su totu s'aeroportu de s'Alighera. At a èssere tando chi amus a bìdere una diferèntzia manna cun sos àteros iscalos.
