Su rimèdiu prus lògicu a sos dannos ambientales cajonados dae s'òmine est su de su riprìstinu de sos padentes e de sos giassos birdes. Sas prantas sunt de importu mannu ca si nche tirant cantidades mannas de anidride carbònica, tratenent s'umididade, amparant su terrinu dae s'erosione e podent suspire fintzas sustàntzias tòssicas e incuinantes. S'idea chi ant àpidu in Tzitade de su Mèssicu movet dae inoghe.
Su progetu faeddat de 18 milliones de àrbores contra a s'incuinamentu atmosfèricu. Su matessi sistema chi ant giai impreadu in Kenya, in ue sunt prantende 20 milliones de àrbores, o in Ìndia, in ue, in una die ebbia, nd'ant postu 50 milliones. Annu cun annu, in sa capitale de sos istados messicanos, s'incuinamentu est creschende semper de prus, arruinende sa calidade de s'àera. Su protzessu de depuratzione at a interessare fintzas sas limitatziones a sa tzircolatzione de sos veìculos comente in sos annos colados e sa cunversione de sos taxi a tecnologia ìbrida.
