de Màuru Piredda
 |
| Deretos lìberos. Url imàgine |
Luc Beaudoin est unu cognitivista canadesu.
De issu si narat chi apat imbentadu una
tècnica pro nche collire sos insonnes intre sos bratzos de Morfeu sena nche colare
iscutas e oras a su gira gira subra de sa banita, isetende chi si
tanchent sos ogros. Pro
Beaudoin est bastante a ammesturare sos meledos sena cunsiderare
un'òrdine lògicu. Antis, òrdine est mègius chi non bi nd'apat, sa
secuèntzia depet èssere casuale. Cara a
custa iscoberta, chi paret finas banale, cada cherta de s'assussegu
benit a nch'èssere posta a banda ca nos tenet ischidados.
Cale est tando, s'àndala de sighire? Una est sa de seberare una cale si
siat paràula (es. "sonnu") e de imaginare trastes, animales, cuntzetos
chi comintzant cun sa matessi lìtera (sa "s"). Si semus galu ischidados
est bastante a colare a sa segunda lìtera ("o"), a sa de tres ("n") e
gasi sighende. S'àtera est sa de impreare s'aplicatzione isvilupada dae
Beaudoin matessi, est a nàrrere MySleepButton, chi nos murmutat sos
faeddos a s'origra.
Sa tècnica de s'ammesturu
cognitivu paret chi non nos agiuet petzi pro dormire. Paret chi siat de
giudu finamentas pro nche pònnere a un'ala sos meledos prus negativos
chi, in unu momentu pretzisu, si podent fàghere logu in sa conca nostra.
