de Màuru Piredda
 |
| Deretos Momentum. Url imàgine |
Sa majoria de su grupu parlamentare de su Partidu laburista (172 deputados contra a 40) at isfidutziadu a Jeremy Corbyn, su presidente eletu in s'istiu coladu a pustis de sas primàrias. Sos blairistas, chi dae cussa cumpetitzione nde fiant essidos a manos iscutas, no ant mai reconnotu sa furriada a manca proposta dae su sutzessore de Ed Miliband. Ant proadu a l'atacare finamentas a pustis de sas eletziones locales, nointamen b'apat àpidu unu resurtu bonu de su Labour. Petzi como, a pustis de sa Brexit, sunt resèssidos a corfare sa ghia sotzialista.
Sa neghe, nât chi, est de no àere cumbìnchidu sos eletores laburistas a s'espressare pro su nono a s'essida dae s'Unione europea. Ma Corbyn paret chi non chèrgiat pigare perunu disinnu de dimissiones: «Su 60% de sos iscritos e de sos sustenidores laburistas m'ant eletu pro una lìnia polìtica noa. No los apo a traìghere». Pro Corbyn «su votu de oe non tenet peruna legitimidade costitutzionale». E galu: «Sos chi cherent mudare sa ghia de su partidu devent pigare parte a un'eletzione democràtica».
In sas punnas de sa manca laburista, como, b'at de pònnere in òpera «atziones urgentes capatzes de amparare sa vida sa gente a pustis de sa Brexit». Est su chi at nâdu John McDonnell, ministru de sas Finàntzias de su guvernu umbra.
Eris, pro defensare a Corbyn, 10mìgia sustenidores ant manifestadu cara a su Parlamentu. No est craru si sa cuntierra at a bogare a campu una partzidura de su Labour. A su chi si narat in sos ambientes pro-Corbyn, sa ghia sotzialista abarrat s'ùnicu polìticu de manca capatze de retzire rispetu e cunfiàntzia dae banda de sos traballadores chi ant votadu pro s'essida de su Regnu unidu dae s'Ue.
