 |
| Incarca subra de s'imàgine pro l'ismanniare |
Chida de votatziones, sa chi nch'est in pessu colada. In su Regnu unidu su 52% de sos chi ant votadu at naradu chi emmo a s'essida de su paisu dae s'Unione europea a pustis de 43 annos (aiat aderidu su 1° de ghennàrgiu de su 1973). Su referendum non fiat vinculante e como amus a bìdere comente s'at a isvilupare sa chistione dae prus de unu puntu de vista: tocat de bìdere comente, dae como in susu, ant a èssere sas relatziones intre sa burghesia albiònica e sa teutònica; e tocat de bìdere sas relatziones intre sas diferentes natziones inguarnissadas in intro de sa Union jack. S'Iscòtzia (cando bi fiat su referendum indipendentista su Snp non chistionaiat de s'essida dae sa Nato), cheret abarrare in s'Ue. E gasi etotu s'Irlanda de su nord. A bìdere istemus. In s'ìnteri b'at àpidu votatziones in un'àteru paisu pluri-natzionale: s'Ispagna.
Su votu ispagnolu arribat a pustis de ses meses de inguvernabilidade. Su 20 de nadale aiat bìnchidu su Partidu populare de Mariano Rajoy; segundos sos sotzialistas de Pedro Sánchez; a sa de tres positzione Podemos de Pablo Iglesias. Eris, pagu prus o mancu, su matessi resurtu. Podemos, chi custu giru fiat in pare cun Izquierda unida de Alberto Garzon (cun sa sigla Unidos Podemos), no est resèssida a nche barigare su Psoe chi, gasi, abarrat comente sa fortza egemònica in intro de sa manca castilliana, andalusa e galitziana. In Euskadi e in Catalugna, imbetzes, sa coalitzione ruju-morada, nch'at coladu a totu cantos: sotzialistas, populares e indipendentistas (finamentas sos de manca de Bildu e Erc). Su Pnv, sos natzionalistas liberales bascsos, fiant primos su 20 de nadale.
Ite b'at a acontèssere? Su resurtu est simigiante a su de ses meses a como. Ma tocat de dare cara a sas variatziones in intro de su matessi partidu. Su Pp balàngiat 690.655 votos e 14 deputados. 17 Comunidades autònomas, 42 Provìntzias e 5405 Comunas sunt biaitos. In su matessi fronte liberista est Ciudadanos chi perdet "carchi" cosa: 376.677 votos e 8 deputados. De colore arantzu peruna Comunidade, peruna Provìntzia e petzi 5 Comunas. A manca, mancari abarret segundu e perdat prus pagu votos de Up (-105.984 cunforma a -1.062.704), su Psoe perdet 5 iscrannos e non conchistat peruna Comunidade ("pèrdida" s'Andalusia guvernada dae Susana Díaz). In sas eletziones de nadale Podemos aiat 69 iscrannos e Izquierda unida (Unidad popular) 2. Como sunt 71, duncas non b'at àpidu perunu efetu multiplicadore, petzi una summa.
Prospetivas? Psoe, Unidos podemos e (annanghende·bi·los cun agigu de fantasia) indipendentistas de manca catalanos e bascos non nche crompent a sa majoria assoluta. Pp e Ciudadanos nemmancu. E si s'Europa (pregonta retòrica) cherreret una grandu coalitzione intre Pp e Psoe? Sos nùmeros bi sunt. Sas cunsighèntzias finamentas. Ma galu est chitzo pro nde faeddare.
